Në Kosovë janë evidentuar 581 mijë e 95 banesa, nga to, 356 mijë e 959 janë të banuara nga një ose më shumë banorë, ndërsa 207 mijë e 165 banesa ose 35,7 për qind janë të pabanuara, përfshirë ato të destinuara për shitje, qira apo përdorime të tjera.
Kështu bënë të ditur Agjencia e Statistikave të Kosovës në publikimin e raportit “Të dhënat për banesat dhe ndërtesat sipas komunave” nga Regjistrimi i Popullsisë, Ekonomive Familjare dhe Banesave 2024.
Në anën tjetër çmimi i banesave viteve të fundit ka shënuar rritje në vazhdimësi në vendin tonë, veçanërisht në Prishtinë.
Sipas ASK-së, publikimi i këtyre statistikave ofron një pasqyrë të qartë mbi zhvillimet në sektorin e ndërtimit dhe mbi përmirësimin e kushteve të jetesës në fushën e banimit në Kosovë.
Analiza e shpërndarjes së banesave të banuara dhe të pabanuara ndihmon në kuptimin e trendëve urbane dhe në identifikimin e nevojave për planifikim të qëndrueshëm të hapësirës për banim në të gjitha komunat e vendit./Kosovapress
