Rritje të reja po shfaqen në horizont, në tremujorin e tretë të vitit për faturat e energjisë elektrike dhe gazit në Itali.
Sipas vlerësimeve të ‘’Nomisma Energia’’, rritja e parë me 17% do të nisë nga 1 korriku dhe e dyta deri në 27% në muajt e ardhshëm.
“Çmimet e gazit dhe të energjisë elektrike në tregjet ndërkombëtare kanë shpërthyer pas vendimit të Rusisë më 16 qershor për të shkurtuar furnizimet për Gjermaninë dhe Italinë”, shpjegon presidenti Davide Tabarelli.
”Në mënyrë të pashmangshme pritet një rritje e madhe e faturave, përndryshe nga ajo që ndodhi në prill. Tani jemi kthyer në trendin e rritjes. Kjo do të jetë një rritje e rëndësishme”, vijon Tabarelli.
Një rritje e faturës së energjisë elektrike prej 17% në 48,5 cent për kWh, e cila për familjen tipike që konsumon 2 700 kWh për kWh/ vit, nënkupton një shpenzim më të madh, me bazë vjetore, prej 194,4 euro.
Më e ”hidhur” është fatura e gazit, norma e së cilës duhet të kërcejë me 27% në 1,57 euro për metër kub, me një shpenzim më të lartë të familjes tipike, që konsumon 1 400 metra kub në vit, prej 462 euro në vit.
