Instituti i Statistikave (INSTAT) raportoi se paga mesatare mujore bruto, në vitin 2021 për një të punësuar me pagë, në Shqipëri, është 57.191 lekë. Krahasuar me vitin 2020, paga mesatare mujore bruto për një të punësuar në Shqipëri u rrit me 6,6 %.
Referuar të dhënave, krahasuar me vitin 2020, punësimi është rritur me 0,4 %, ndërsa shkalla zyrtare e papunësisë (për grup-moshën 15-74 vjeç) është ulur me 0,2 %.
INSTAT thotë se hendeku gjinor në paga është 4,5 %. Pra meshkujt kanë një pagë mesatare mujore bruto 4,5 % më të lartë sesa femrat. Krahasuar me vitin 2020, vihet re një ulje e hendekut gjinor në paga me 2,0 pikë përqindje.
Sipas INSTAT-it, 32,7 % e kontribuesve në kategorinë e të punësuave me pagë marrin një pagë mesatare mujore bruto deri në nivelin e pagës minimale zyrtare.
Sipas vlerësimeve të anketës për vitin 2021, rezulton se 47,9 % e të punësuarve janë të punësuar me pagë, 32,0 % janë të vetë-punësuar (punëdhënës ose të vetëpunësuar pa të punësuar të tjerë) dhe 20,1 % janë punëtorë pa pagesë në biznesin e familjes.
