Insidor Rexhepi emërohet drejtor i Drejtorisë së Përgjithshme Antikorrupsion. DPAK do kryejë hetime për Administratën. Drejtoria u krijua më 26 qershor dhe do të ketë koordinatorë në 26 institucione
Kryeministri Edi Rama emëroi Insidor Rexhepin si drejtor të Përgjithshëm të Drejtorisë së Antikorrupsionit DPAK.
Rexhepi, i cili më parë ka mbajtur postin e këshilltarit ligjor në Komisionin e Pavarur të Kualifikimit, KPK do të drejtojë Drejtorisë së Përgjithshme të Antikorrupsionit, (DPAK) e cila ka për mision të sigurojë parandalimin e goditjen e korrupsionit në institucionet e administratës shtetërore/entet publike/shoqëritë tregtare me kapital shtetëror.
Vendimi është marrë në mbledhjen e datës 20 Nëntor të Këshillit të Ministrave. Ndërsa DPAK ngrit me vendim qeverie më 26 qershor 2024 dhe do të ketë koordinatorë në 26 institucione.
DPAK do të kryejë hetime administrative, për rastet e dyshuara si praktika abuzive ose korruptive.
Në çdo rast, në përfundim të hetimit hartohet raport përfundimtar, i cili i propozohet për miratim drejtorit të Përgjithshëm të DPAK-së.
Kush është Insidor Rexhepi
Diplomohet “Jurist” në vitin 2008, në Fakultetin e Drejtësisë, Tiranë. Në vitet 2009-2012 ka ushtruar funksionin e inspektorit në sektorë të ndryshëm të Drejtorisë Rajonale të Tatimeve, Tiranë. Në vitet 2012-2017 ka punuar si inspektor hetimi në Drejtorinë e Hetimit Tatimor. Ka ndjekur trajnime dhe specializime të vazhdueshme, si dhe është njohës i mirë i legjislacionit të fushës hetimore tatimore, hetimeve penale për krimet në fushën ekonomiko-financiare, pas një eksperience disavjeçare bashkëpunimi me Prokurorinë, si me referimin, hetimin dhe dërgimin e shumë çështjeve për gjykim. Zotëron gjuhën angleze dhe italiane.
