Inflacioni në eurozonë u konfirmua në 2.8% për muajin qershor, sipas të dhënave të publikuara të premten, duke shënuar rënien e parë gjatë këtij viti. Kjo i jep Bankës Qendrore Evropiane (BQE) një argument të fortë për të mbajtur të pandryshuar normën e interesit të depozitave në 2.25%, kur Këshilli Drejtues të mblidhet këtë javë.
Të dhënat përfundimtare të Eurostat-it treguan se inflacioni vjetor ra nga 3.2% në maj në 2.8% në qershor, rënia e parë që nga fillimi i përshpejtimit të çmimeve në janar. Kjo vjen më pak se një javë përpara se Banka Qendrore Evropiane të shpallë vendimin e saj për politikën monetare dhe të vendosë nëse rritja e parë e normave të interesit në gati tre vjet, e bërë në qershor, duhet të pasohet nga një tjetër.
Detajet e raportit mbështesin më shumë një pauzë sesa një rritje të re të normave.
Inflacioni bazë, i cili përjashton energjinë, ushqimet, alkoolin dhe duhanin, u ngadalësua nga 2.6% në 2.4%. Inflacioni i energjisë ra nga 10.8% në 8.5%, ndërsa inflacioni i shërbimeve zbriti nga 3.5% në 3.2%. Norma e përgjithshme e inflacionit u ul në 22 nga 27 shtetet anëtare të Bashkimit Evropian.
Ndër katër ekonomitë më të mëdha të eurozonës, inflacioni ishte:
- Gjermania: 2.4%
- Franca: 2%
- Italia: 3%
- Spanja: 3.6%
Këto shifra kanë rëndësi për shkak të zhvillimeve që i paraprinë.
Në qershor, Banka Qendrore Evropiane rriti normën e interesit të depozitave nga 2% në 2.25%, për herë të parë në gati tre vjet, pasi lufta me Iranin e shtyu inflacionin në eurozonë në 3.2% në maj, niveli më i lartë që nga shtatori i vitit 2023.
Përshkallëzimi i ri i konfliktit me Iranin
Megjithatë, faktori që çoi në atë rritje të normave është rikthyer.
Çmimi i naftës arriti pranë 120 dollarëve për fuçi në mars, por më pas ra në rreth 72 dollarë pas një marrëveshjeje të përkohshme paqeje në fund të qershorit. Megjithatë, armëpushimi është dobësuar ndjeshëm gjatë këtij muaji.
Shtetet e Bashkuara të Amerikës dhe Irani kanë shkëmbyer sulme të reja. Teherani ka sulmuar anije tregtare dhe ka kërcënuar eksportet rajonale të energjisë, ndërsa Shtetet e Bashkuara kanë rivendosur sanksionet dhe kanë forcuar bllokadën detare, duke e çuar çmimin e naftës Brent në 87 dollarë për fuçi të premten.
Sipas bankës ING, kjo përshkallëzim ka rikthyer mundësinë e një rritjeje të papritur të normave të interesit këtë të enjte, megjithëse banka pret që Banka Qendrore Evropiane t’i mbajë normat të pandryshuara dhe e konsideron një rritje tjetër më të mundshme në shtator.
Gjithashtu, mbledhja e korrikut nuk është një takim në të cilin publikohen parashikime të reja ekonomike, gjë që u jep politikëbërësve mundësinë të presin për projeksionet e përditësuara përpara se të ndërmarrin hapa të tjerë.
Duke folur në forumin e Bankës Qendrore Evropiane në Sintra, presidentja e BQE-së, Kristin Lagard, theksoi se rritja e normave në qershor nuk ishte një “rritje parandaluese”, por një përgjigje ndaj një problemi real me inflacionin.
Ajo deklaroi se parashikimet e Bankës Qendrore Evropiane tregojnë se inflacioni do të rikthehet në objektivin prej 2% vetëm në fund të vitit 2027, dhe vetëm nëse politika monetare shtrëngohet më tej.
Lagard refuzoi gjithashtu të angazhohej për një kurs të paracaktuar të politikës monetare, duke theksuar se “udhëzimi paraprak nuk është më në tryezë” dhe se vendimet do të merren nga një mbledhje në tjetrën, bazuar në të dhënat më të fundit ekonomike.
Qëndrimi i bankave të tjera qendrore
Banka Qendrore Evropiane mbetet e vetmja bankë qendrore e madhe në Perëndim që ka rritur normat e interesit.
Rezerva Federale e Shteteve të Bashkuara (Fed) e la të pandryshuar normën bazë të interesit në 3.50%-3.75% në mbledhjen e qershorit, e para nën drejtimin e kryetarit Kevin Warsh, megjithëse qëndrimi i tij i ashpër ndaj inflacionit shkaktoi luhatje në tregje.
Edhe Banka e Anglisë e mbajti të pandryshuar normën bazë të interesit në 3.75%, me një votim 7 me 2, ku dy anëtarë të komitetit mbështetën një rritje në 4.0%.
Ndërkohë, Banka e Japonisë e rriti normën e saj të interesit në 1.0%, niveli më i lartë në 31 vjet./Përshtati nga Euronews, ekofin.al
