Indeksi i Harmonizuar i Çmimeve të Konsumit, që mat rritjen e çmimeve sipas metodologjisë së Eurostat, në muajin Tetor të vitit 2024 regjistrohet në 2.3%. kjo shifër për Shqipërinë është e njëjtë me inflacionin në Eurozonë, që për muajin e kaluar rezultoi në 2.3%. Ndërkohe, sipas matjeve të INSTAT, inflacioni i tetorit ishte 1.9%.
Ndryshimet në metodologji kanë të bëjnë me peshën që i jepet secilit grup në normën e inflacionit, nga INSTAT dhe Eurostat. Tashmë, për muajin e dytë rradhazi, norma e inflacionit të Shqipërisë rezulton e barazuar me mesataren e Eurozonës.
Sa i përket vendeve të rajonit, Shqipëria vijon të ketë një inflacion të moderuar, ndërkohë që në Serbi apo në Maqedoninë e Veriut inflacioni llogaritet në 4.6%. Mali i Zi ka një inflacion disi më të ulët se ne, në 1.8%, ndërsa në Kosovë inflacioni ka zbritur deri në 0.4%.
Sipas publikimit të Instat për indeksin e harmonizuar të çmimeve të konsumit, rritja më e madhe e çmimeve për Tetorin vërehet te “Pije alkoolike dhe duhan” me 4.1%, ndjekur nga grupet “Argëtim dhe kulturë” me 3.7%, si edhe “Ushqime dhe pije joalkoolike” me 3.6%. /ekofin.al
