Rënia nën objektivin prej 2% ka ardhur kryesisht nga rënia e çmimeve të energjisë. Megjithatë, ekonomia evropiane mund të mos jetë ende jashtë rrezikut.
Norma e inflacionit të Eurozonës nga viti në vit për shtatorin u publikua të martën, duke arritur në 1.8%, sipas Eurostat. Kjo shifër ishte më pak se 2.2% e muajit gushtit, por edhe më e ulët nga 1.9 % që prisnin analistët. Ishte gjithashtu shifra më e ulët që nga prilli 2021, duke e ulur me sukses inflacionin nën objektivin prej 2% të Bankës Qendrore Evropiane.
Ulja e inflacionit erdhi kryesisht si pasojë e rënies së çmimeve të energjisë, të cilat ranë në -6% në shtator, nga -3% në gusht. Inflacioni i shërbimeve gjithashtu u ul në 4% në shtator nga 4.1% një muaj më parë. Megjithatë, inflacioni i ushqimeve, duhanit dhe alkoolit u rrit lehtë, në 2.4% në shtator, nga 2.3% në gusht.
Norma e inflacionit bazë nga viti në vit arriti në 2.7% në shtator nga 2.8% një muaj më parë. Inflacioni francez në shtator ra në 1.5% nga 2.2% në gusht, ndërsa inflacioni spanjoll zbriti në 1.7% nga 2.4% në gusht. Inflacioni italian gjithashtu u zbut në 0.8% në shtator nga 1.2% në muajin e mëparshëm, njësoj si edhe inflacion gjerman, në 1.8% në shtator nga 2% në gusht.
Megjithëse normat e inflacionit të shtatorit janë premtuese, ekonomia e eurozonës mund të mos jetë ende plotësisht e qartë. Banka Qendrore Evropiane ka zbuluar së fundmi se ende pret që inflacioni të rritet sërish në muajt e fundit të vitit, kryesisht për shkak të stabilizimit të çmimeve të energjisë.
BQE uli normat e interesit në 3.50% në shtator dhe gjithashtu ka lënë të kuptohet se një ulje tjetër mund të vijë në të ardhmen e afërt.
