Të dhënat më të fundit nga Ministria e Financave tregojnë se në qershor 2025 importet e mallrave të akcizës kanë shënuar rritje krahasuar me të njëjtin muaj të një viti më parë. Rritja më e madhe është regjistruar te karburantet, ndërsa cigaret kanë pësuar një rënie të konsiderueshme.
Në total, gjatë muajit qershor janë importuar 345,202 ton karburante, nga 301,129 ton në qershor 2024, ose 44,073 ton më shumë.
Po kështu rritje ka pasur edhe te kafeja, e cila arriti në 4760 ton, nga 4292 ton një vit më parë, tregues për rritjen e konsumit, kjo edhe si pasojë e shifrave në rritje të turizmit.
E njëjta gjë ka mdodhur edhe me importet e birrës që rezultojnë 26,245 mijë litra në qershor 2025 nga 23,226 në të njëjtën periudhë të vitit 2024.
Rënie ka shënuar grupi i cigareve, me 1308 ton të importuara në qershor 2025, nga 1451 ton në të njëjtin muaj të vitit të kaluar, një ulje prej 143 ton.
Të dhënat sugjerojnë një rritje të fortë të kërkesës për karburante dhe produkte të tjera të konsumit të përditshëm si kafeja, ndërkohë që konsumi i cigareve shfaq një tendencë rënëse./ekofin.al
