Qytetet më fitimprurëse për investime në pasuri të paluajtshme në Europë nuk janë më domosdoshmërisht metropolet tradicionale si Londra apo Parisi. Sipas analizave të tregut të publikuara së fundmi, qytetet e Europës Qendrore dhe Lindore po ofrojnë kthime shumë më të larta nga qiratë, falë çmimeve ende relativisht të ulëta të pronave dhe kërkesës në rritje për banesa me qira.
Në krye të listës renditet Riga, kryeqyteti i Letonisë, me një normë mesatare fitimi nga qiratë prej 8.47%. Qyteti baltik po tërheq investitorë falë kostove më të ulëta të hyrjes në treg dhe rritjes së kërkesës për apartamente me qira. Në disa lagje, fitimi mund të kalojë edhe 11%.
Pas Rigës vjen Dublini në Irlandë, me një kthim mesatar prej 6.83%. Kërkesa e fortë për strehim, e nxitur nga kompanitë shumëkombëshe dhe sektori i teknologjisë, po e mban tregun e qirave shumë aktiv.
Në vendin e tretë renditet Podgorica e Malit të Zi, me një normë fitimi prej 6.67%. Kryeqyteti malazez konsiderohet një treg në rritje për investitorët, falë çmimeve të ulëta të pronave dhe afërsisë me zonat turistike të Adriatikut.
Warsawa në Poloni vazhdon të jetë një tjetër destinacion i preferuar për investime në pasuri të paluajtshme, me kthime mesatare nga qiratë prej 6.49%. Ekonomia në rritje dhe popullsia e re po mbajnë të lartë kërkesën për apartamente me qira.
Edhe Bukureshti në Rumani po shihet si një treg me potencial të madh, sidomos pas hyrjes së plotë të vendit në zonën Schengen. Kryeqyteti rumun ofron fitime mesatare nga qiratë prej mbi 6%.
Analistët e tregut theksojnë se investitorët po largohen gradualisht nga qytetet shumë të shtrenjta si Londra dhe Parisi, ku çmimet e larta të pronave e ulin ndjeshëm kthimin nga qiratë. Në vend të tyre, po fitojnë terren tregje më të lira, por me kërkesë të lartë për banim, si qytetet e Europës Lindore dhe Ballkanit.
Sipas të dhënave të fundit mbi tregun europian të pasurive të paluajtshme, investitorët po orientohen gjithnjë e më shumë drejt qyteteve ku kombinimi mes çmimit të pronës dhe të ardhurave nga qiraja krijon marzhe më të favorshme fitimi./Përshtati nga Euronews, ekofin.al
