Qeveria ka hapur zyrtarisht procesin për përzgjedhjen e 5 anëtarëve të rinj të Bordit Mbikëqyrës të Agjencisë për Mbështetjen e Shoqërisë Civile (AMSHC), duke ftuar organizatat e shoqërisë civile të propozojnë kandidaturat e tyre brenda afateve të përcaktuara.
Sipas njoftimit të publikuar më 25 maj 2026, konkurrimi është i hapur vetëm për përfaqësues të shoqërisë civile, ndërsa kandidatët duhet të plotësojnë një sërë kriteresh ligjore dhe profesionale. Mes kushteve kryesore janë që aplikantët të jenë shtetas shqiptarë, të mos kenë precedentë penalë apo masa sigurie në kuadër të ligjit të dekriminalizimit, si edhe të kenë të paktën tre vite përvojë pune me organizatat e shoqërisë civile.
Një nga kriteret që vlerësohet me përparësi është ekspertiza në grantdhënie ose në zbatimin e projekteve, ndërsa kandidatët duhet të mbështeten nga të paktën pesë organizata jofitimprurëse ose organizata të shoqërisë civile që operojnë në të njëjtën fushë apo në fusha të ngjashme. Sipas rregullave të përcaktuara, çdo organizatë mund të mbështesë vetëm një kandidat.
Në dokumentacionin e aplikimit kërkohet përfshirja e kërkesës për aplikim, CV-së, referencave dhe letrave mbështetëse nga organizatat përkatëse, si dhe dokumenteve të tjera provuese që vërtetojnë përmbushjen e kritereve të kandidimit.
Procesi bazohet në ligjin nr.10093, datë 9 mars 2009 “Për organizimin dhe funksionimin e Agjencisë për Mbështetjen e Shoqërisë Civile”, si dhe në vendimin nr.768 të Këshillit të Ministrave për procedurat dhe rregullat e kandidimit dhe përzgjedhjes së anëtarëve të Bordit Mbikëqyrës të AMSHC-së.
Afati për dorëzimin e aplikimeve është përcaktuar deri më 25 qershor 2026, ndërsa organizatat e shoqërisë civile kanë 15 ditë pune nga data e shpalljes së njoftimit për të paraqitur kandidaturat dhe dokumentacionin përkatës./ekofin.al
