Gjermania voton sot në zgjedhjet e parakohshme që po mbahen pas rënies së koalicionit qeverisës trepalësh të kancelarit Olaf Scholz nëntorin e kaluar.
Gjermanët do të zgjedhin mes kancelarit aktual Olaf Scholz, nga Social-Demokratët e qendrës së majtë, Friedrich Merz i Unionit Demokristian, Robert Habeck, nga Të Gjelbrit, dhe Alice Weidel e partisë së ekstremit të djathtë.
Koalicioni konservator Unioni Kristian Demokrat (CDU) / Unioni Kristian Social (CSU) nën Friedrich Merz është përpara në sondazhe me rreth 30%.
Merz u zotua të jetë një zë i fortë në Evropë në tubimin e fundit të CDU-së përpara votimit.
Sondazhet vendosin Alternativën për Gjermaninë (AfD) të ekstremit të djathtë në vendin e dytë. Asnjë parti nuk ka shprehur gatishmërinë për një koalicion me AfD.
Social Demokratët në pushtet (SPD) nën kancelarin aktual Scholz kanë qenë në vend të tretë. Kjo i bën ata një partner të mundshëm koalicioni për CDU-në. Të Gjelbrit janë një alternativë tjetër e mundshme.
Në Gjermani janë më shumë se 59 milionë qytetarë me të drejtë vote, që do të zgjedhin 630 anëtarët e dhomës së ulët të parlamentit, të njohur si Bundestag.
Në fletëvotim janë 29 parti, por sipas sondazheve pesë deri në tetë prej tyre mund të marrin vota të mjaftueshme për të fituar vendet në parlament.
Në shumicën e rasteve, partitë duhet të fitojnë së paku 5% të votave për të hyrë në Bundestag.
