Franca ka njoftuar se deri në vitin 2027 do të shtrijë përdorimin e platformës Visio në të gjitha institucionet qeveritare.
Franca do të zëvendësojë platformat amerikane Microsoft Teams dhe Zoom me platformën e saj vendase për videokonferenca, e cila do të përdoret në të gjitha departamentet qeveritare deri në vitin 2027, njoftoi vendi të hënën.
Ky hap është pjesë e strategjisë së Francës për të ndërprerë përdorimin e ofruesve të huaj të softuerëve, veçanërisht atyre nga Shtetet e Bashkuara, dhe për të rimarrë kontrollin mbi infrastrukturën kritike digjitale. Ai vjen në një moment kyç, ndërsa Franca, ashtu si Europa, po arrin një pikë kthese në lidhje me sovranitetin digjital.
“Qëllimi është t’i japim fund përdorimit të zgjidhjeve jo-europiane dhe të garantojmë sigurinë dhe konfidencialitetin e komunikimeve elektronike publike, duke u mbështetur në një mjet të fuqishëm dhe sovran,” deklaroi David Amiel, ministër për shërbimin civil dhe reformën e shtetit.
Të hënën, qeveria njoftoi se në vend të tyre do të përdorë platformën franceze të videokonferencave Visio. Platforma ka qenë në fazë testimi për një vit dhe aktualisht ka rreth 40 mijë përdorues.
Çfarë është Visio?
Visio është pjesë e planit “Suite Numérique” të Francës, një ekosistem digjital me mjete sovrane të projektuara për të zëvendësuar shërbimet online amerikane si Gmail dhe Slack. Këto mjete janë të destinuara për nëpunësit civilë dhe jo për përdorim nga publiku apo kompanitë private.
Platforma përfshin gjithashtu funksione të mbështetura nga inteligjenca artificiale për transkriptimin e takimeve dhe identifikimin e folësve, duke përdorur teknologjinë e start-up-it francez Pyannote.
Visio është e hostuar në infrastrukturën sovrane cloud të kompanisë franceze Outscale, një degë e kompanisë së softuerëve Dassault Systèmes.
Qeveria franceze tha se kalimi në Visio mund të ulë kostot e licencimit dhe të kursejë deri në 1 milion euro në vit për çdo 100 mijë përdorues.
Ky vendim vjen gjithashtu në një kohë kur Europa ka vënë në pikëpyetje varësinë e tepruar nga infrastruktura amerikane e teknologjisë së informacionit (IT), pas ndërprerjeve të shërbimeve cloud në SHBA vitin e kaluar.
“Kjo strategji thekson angazhimin e Francës ndaj sovranitetit digjital, në një kontekst tensionesh gjeopolitike në rritje dhe frike nga mbikëqyrja e huaj apo ndërprerjet e shërbimeve,” tha Amiel./Përshtati nga Euronews, ekofin.al
