Fondi Monetar Ndërkombëtar në raportin më të fundit për vendin tonë ndalet edhe te paga minimale, ku thekson se është ndër më të ultat në Europë. Por, institucioni me bazë në Washington i mëshon më së shumti faktit se rritja e pagës minimale në vendin tonë, shkakton rritje te informalitetit. Sipas FMN, informaliteti në tregun e punës në vendin tonë fiksohet pranë 30.3%, që është edhe norma më e lartë në Europë.
“Në Shqipëri, aktualisht paga minimale është sa 64% e fitimeve mesatare bruto, por informaliteti i lartë në tregun e punës sugjeron një nevojë për kujdes në interpretimin e kësaj normë”-thotë FMN mes reshtave në raport për vendin tonë. Rreth 1 në 3 të punësuar në vend, pra ata që janë të paformalizuar nuk do të preken, ose do të preken shumë pak nga rritja e pagës minimale, edhe pse ata janë më keq të paguar se të tjerët.
“Mbi të gjitha, rritjet e kaluara të pagës minimale kanë përkuar me një rritje të informalitetit, çka mund të vendosë presion të shtuar ndaj atyre më në nevojë”-thotë ndër të tjera FMN, që rekomandon që rritja e pagës minimale të vijë jo vetëm me një sforco të shtuar ndaj informalitetit në tregun e punës, por edhe më një rritje të produktivitetit.
“Rritja e pagës minimale duhet të jetë në linjë me evoulimin e produktivitetit për të kompensuar punonjësit ne linjë me kontributin e tyre ndaj prodhimit, duke shmangur kështu shtrembërime ekonomike. Produktiviteti në Shqipëri është i ulët krahasuar me BE apo vendet fqinje dhe ka qenë në rënie gjatë viteve të fundit”-nënvizon Fondi Monetar Ndërkombëtar në raport.
Kujtojmë se qeveria shqiptare është angazhuar në ambicien e saj për të rritur pagën minimale pranë 40 mijë lekëve brenda 4 viteve të mandatit qeverisës. Për FMN kjo rritje po nuk u shoqëruara me ndërhyrje në informalitetin e lartë dhe produktivitetin e ulët, do të sjellë pasoja negative.
