Planet e udhëtimit të mijëra pasagjerëve në shtator pritet të preken, pasi unioni më i madh i kontrollorëve të trafikut ajror në Francë ka dorëzuar njoftimin për grevë.
Sindikata SNCTA, që përfaqëson rreth 60% të kontrollorëve të trafikut ajror në vend, ka konfirmuar se do të zhvillojë një grevë 24-orëshe nga mëngjesi i 18 shtatorit deri në fund të datës 19 shtator.
Shkaku i grevës
SNCTA e justifikoi vendimin me “dështimin e dialogut” me Autoritetin e Aviacionit Civil Francez (DGAC).
Në një deklaratë, sindikata tha: “Prej disa vitesh tashmë, qeverisja e kontrollit ajror është karakterizuar nga mosbesimi, praktikat ndëshkuese dhe metoda të degraduara menaxhimi. Është e qartë se ky dialog i pafrytshëm po bllokon çdo perspektivë për progres dhe reformë.”
Kaos i mundshëm në Francë dhe Evropë
Kontrollorët e trafikut ajror në të gjitha aeroportet e Francës, përfshirë Paris Charles-de-Gaulle, janë thirrur të marrin pjesë. Sindikatat e tjera të sektorit, UNSA-ICNA dhe USAC-CGT, ende nuk kanë konfirmuar nëse do t’i bashkohen grevës.
Megjithatë, shumë fluturime drejt dhe nga aeroportet franceze, si dhe ato që kalojnë në hapësirën ajrore franceze – përfshirë linjat nga Mbretëria e Bashkuar, Spanja dhe Italia – pritet të preken. Detajet e sakta të anulimeve dhe vonesave do të publikohen nga DGAC dy ditë para nisjes së grevës.
Pasagjerëve që kanë planifikuar fluturime gjatë kësaj periudhe u këshillohet të qëndrojnë në kontakt me linjat ajrore për informacion të përditësuar.
Çfarë mësuan pasagjerët nga grevat e kaluara
Greva e fundit, e zhvilluar më 3-4 korrik nga sindikatat më të vogla, shkaktoi kaos në mbarë Evropën.
Sipas Eurocontrol, mbi një milion pasagjerë u prekën dhe mijëra fluturime u anuluan. Vetëm kompania Ryanair raportoi një kosto prej mbi 100 milionë eurosh, duke fajësuar “menaxhimin e dështuar”.
Edhe pse SNCTA nuk mori pjesë në grevën e korrikut, vendimi për të hyrë në grevë këtë herë ka ngritur shqetësime se ndikimi në shtator mund të jetë edhe më i madh, për shkak të peshës së saj në sektor.
Kërkesat e sindikatës
SNCTA kërkon rritje pagash në përputhje me inflacionin dhe “ndryshim të thellë në menaxhimin e operacioneve” te DGAC. Sindikata e theksoi se greva është “zgjidhja e fundit” pas shumë përpjekjeve për dialog social dhe propozimeve konkrete.
Edhe nëse sindikatat e tjera nuk bashkohen, aksioni pritet të ndikojë në mijëra fluturime. Pasagjerëve u këshillohet të kontrollojnë rregullisht oraret, të kontaktojnë linjat ajrore para udhëtimit dhe të parashikojnë kohë shtesë për ndërlidhjet, pasi priten vonesa të gjata dhe anulime në të gjithë Evropën./Përshtati nga Euronews, ekofin.al
