Një shqiponjë me krahë të stolisur me diamante mban një mburojë prej rubini dhe shtrëngon në kthetra një degë ulliri të zbukuruar me smeralde. Mbi të është gdhendur numri “250”, ndërsa poshtë shfaqet mbishkrimi “250 YEARS USA” (250 VJET SHBA), i punuar në ar 18-karatësh. Dhjetëra diamantë të tjerë formojnë numrat 45 dhe 47, të vendosur në formën e logos së Superman-it.
Në total, unaza prej ari, me përmasa të ngjashme me një orë dore, është e zbukuruar me 321 diamante, 56 safirë, 13 smeralde dhe 6 rubinë. Ajo iu dorëzua këtë javë Bill White, ambasadorit të Shteteve të Bashkuara në Belgjikë, me qëllim që t’ia përcillte Presidentit Donald Trump.
“Një falënderim i veçantë për miqtë e mi nga Antverpi për unazën madhështore Freedom 250,” tha Trump në një mesazh të regjistruar paraprakisht, i transmetuar gjatë një aktiviteti në Bruksel për përkujtimin e 250-vjetorit të pavarësisë së Shteteve të Bashkuara.
Dhurata u dorëzua nga Isidore Mörsel, president i Antwerp World Diamond Centre (AWDC), në emër të komunitetit shumë shekullor të tregtarëve të diamantëve në qytetin portual belg të Antverpit. Ky qytet është një nga qendrat më të rëndësishme të tregtisë botërore të diamantëve, por vitin e kaluar industria u përball me vështirësi për shkak të luftës tregtare të nisur nga administrata Trump.
“Le të shërbejë kjo unazë si një kujtesë e përhershme se partneritetet e vërteta, ashtu si diamantët natyrorë më cilësorë, krijohen nën presion, i rezistojnë kohës dhe shkëlqejnë më shumë kur ndërtohen mbi besimin,” deklaroi Mörsel.
Në pjesën e brendshme të unazës është gdhendur mbishkrimi: “Punuar në Antverp për Donald John Trump.”
Megjithëse vlera e saj është shumë më e ulët krahasuar me dhurata të tjera luksoze, si avioni me vlerë rreth 400 milionë dollarë i dhuruar nga Katari, të cilin Trump urdhëroi të përshtatej si një avion i ri presidencial Air Force One, unaza ofron një tjetër shembull të dhuratave ekstravagante që përdoren për të fituar simpatinë e presidentit amerikan.
Një zyrtar i Shtëpisë së Bardhë, i cili foli në kushte anonimiteti, konfirmoi se deri të enjten unaza ende nuk i ishte dorëzuar Trumpit.
Dhurata pas heqjes së tarifave për diamantët belgë
Dhurimi i unazës vjen vetëm disa muaj pasi industria belge e diamantëve arriti të sigurojë heqjen e tarifave doganore amerikane për importin e diamantëve.
Në shtator, AWDC njoftoi se kishte arritur të siguronte një tarifë zero për qind për eksportet vjetore prej më shumë se 2 miliardë dollarësh diamantësh të përpunuar nga Antverpi drejt Shteteve të Bashkuara.
Një zëdhënës i organizatës deklaroi se AWDC kishte ofruar ekspertizë dhe informacion teknik për Komisionin Evropian gjatë negociatave me administratën Trump për marrëveshjen mbi tarifat në vitin 2025, por mohoi të kishte lobuar drejtpërdrejt pranë administratës amerikane.
Rregullat për pranimin e dhuratave nga presidentët amerikanë
Presidentët e SHBA-së kanë një shkallë të konsiderueshme diskrecioni për të pranuar dhurata nga individë ose organizata vendase dhe të huaja. Ata mund të vendosin vetë nëse një dhuratë është bërë për ta personalisht apo për shtetin amerikan.
Përjashtim bëjnë dhuratat nga qeveritë e huaja, të cilat ndalohen nga Kushtetuta amerikane, përveç rasteve kur miratohen nga Kongresi. Megjithatë, nëse një president dëshiron ta mbajë një dhuratë zyrtare, ai mund të rimbursojë Thesarin Amerikan me vlerën e plotë të saj.
Po ashtu, dhuratat personale duhet të deklarohen në raportin vjetor të transparencës financiare të presidentit.
Deklarimi financiar i Trump për vitin 2025, i publikuar këtë javë, tregon se ai ka marrë si dhuratë një skulpturë me vlerë 250 mijë dollarë, që paraqet gjestin e tij triumfues pas atentatit të dështuar gjatë një tubimi elektoral në Butler, Pensilvani, në vitin 2024. Gjithashtu, ai deklaroi edhe bileta për 10 aktivitete sportive, përfshirë finalen e ardhshme të Kupës së Botës në New Jersey, të dhuruara nga presidenti i FIFA-s, Gianni Infantino, me një vlerë totale prej rreth 15 mijë dollarësh.
Katër ekspertë amerikanë të etikës, të cituar nga agjencia Associated Press, vlerësojnë se Trump është larguar nga praktika shumëvjeçare e presidentëve amerikanë për të shmangur pranimin e dhuratave të tilla.
Unaza vlerësohet deri në 35 mijë dollarë
Për realizimin e unazës, AWDC bashkëpunoi me David Gotlib, një argjendar luksi nga Antverpi, produktet e të cilit mund të shiten për më shumë se 15 mijë euro.
As AWDC dhe as Gotlib nuk kanë bërë publike vlerën zyrtare të unazës. Megjithatë, dy argjendarë të pavarur, të pyetur nga Associated Press, e vlerësuan atë mes 25 mijë dhe 35 mijë dollarëve.
Pas prezantimit të unazës në skenën e dekoruar me simbolet amerikane në Bruksel, këngëtarja Alexis Wilkins, partnerja e drejtorit të FBI-së Kash Patel, interpretoi himnin kombëtar amerikan përpara më shumë se 8 mijë pjesëmarrësve, të cilët konsumonin birrë Budweiser dhe uiski bourbon nga shtetet Tennessee dhe Kentucky.
Ambasadori Bill White deklaroi se kishte siguruar mbi 5.5 milionë dollarë sponsorizime për organizimin e festimeve të 250-vjetorit të SHBA-së. Mes sponsorëve ishin gjigantët e industrisë së mbrojtjes Lockheed Martin dhe Northrop Grumman, kompanitë e teknologjisë Intel, Google dhe Meta, si edhe prodhuesit evropianë të çokollatës Leonidas dhe Ferrero. Edhe AWDC kontribuoi financiarisht në organizimin e aktivitetit.
“Media pyeste: ‘Pse duhet të jetë kaq madhështore kjo festë?’ Përgjigjja ime është e thjeshtë: Sepse ne jemi Shtetet e Bashkuara të Amerikës,” u shpreh White.
Ndërkohë, fati i unazës mbetet ende i paqartë.
Të mërkurën, White publikoi në rrjetet sociale një fotografi ku shfaqej duke mbajtur unazën në dorë dhe duke bërë shenjën e miratimit me gishtin e madh. Më pas, postimi u fshi. /Përshtati nga Euronews, ekofin.al
