Procesi i kompensimit të fermerëve përmes skemës së autofaturimit ka vijuar gjatë muajve të verës, me mbi 4 mijë aplikime të dorëzuara vetëm në periudhën korrik-gusht.
Sipas të dhënave të publikuara nga Administrata Tatimore, gjatë periudhës 1 korrik–31 gusht 2026 janë dorëzuar online gjithsej 4,104 aplikime nga fermerët që kërkojnë të përfitojnë nga kompensimi.
Nga numri i përgjithshëm i kërkesave, 2,906 aplikime janë miratuar deri më tani, ndërsa 1,016 të tjera ndodhen ende në proces shqyrtimi.
Kjo do të thotë se rreth 71% e aplikimeve të paraqitura gjatë kësaj periudhe kanë marrë tashmë miratimin, ndërsa afërsisht një në katër kërkesa është ende duke u verifikuar.
Sipas Administratës Tatimore, shuma totale e kompensimit prej 10% arrin në 10 milionë euro, duke përfaqësuar një injektim të drejtpërdrejtë financiar për fermerët që tregtojnë prodhimet e tyre nëpërmjet skemës së autofaturimit.
Mekanizmi synon të kompensojë fermerët dhe njëkohësisht të nxisë formalizimin e transaksioneve në sektorin bujqësor, duke krijuar gjurmueshmëri më të madhe të shitjeve të produkteve bujqësore.
Procesi i aplikimit zhvillohet online. Administrata Tatimore u ka rikujtuar fermerëve se kërkesat për përfitimin e kompensimit mund të paraqiten përmes sistemit e-Filing.
Nga të dhënat e publikuara rezulton gjithashtu se 182 aplikime nga totali i paraqitur nuk përfshihen as te kërkesat e miratuara dhe as te 1,016 aplikimet që raportohen në proces shqyrtimi. Njoftimi nuk jep informacion të mëtejshëm mbi statusin e kësaj pjese të aplikimeve.
Skema e kompensimit përmes autofaturës është veçanërisht e rëndësishme për fermerët që shesin prodhimet e tyre te subjektet grumbulluese apo përpunuese, ndërsa ecuria e aplikimeve dhe ritmi i disbursimit të shumave do të përcaktojnë edhe efektin financiar që mekanizmi do të ketë për sektorin bujqësor./ekofin.al
