Administrata Tatimore ka nisur zyrtarisht nga data 10 qershor 2026 zbatimin e skemës së faljes me kusht të detyrimeve tatimore, gjobave dhe kamatëvonesave, një mekanizëm që synon të lehtësojë barrën financiare të tatimpaguesve dhe njëkohësisht të rrisë arkëtimet në buxhetin e shtetit.
Sipas njoftimit të Administratës Tatimore, pagesat për përfitimin nga falja fiskale po kryhen në zbatim të ligjit nr. 86/2025, i cili parashikon lehtësira të konsiderueshme për detyrimet e krijuara ndër vite.
Masa më e favorshme lidhet me detyrimet e periudhës 2015-2019. Tatimpaguesit që shlyejnë brenda datës 30 qershor 2026 gjysmën e detyrimit kryesor do të përfitojnë fshirjen e 50% të principalit, si edhe eliminimin e plotë të gjobave dhe kamatëvonesave. Kjo do të thotë se një biznes ose individ mund të mbyllë detyrimet e vjetra duke paguar vetëm gjysmën e borxhit bazë.
Një alternativë e dytë është parashikuar për ata që nuk arrijnë të përfitojnë nga afati i parë. Për të njëjtën periudhë, 2015-2019, ligji parashikon fshirjen e 25% të detyrimit principal dhe heqjen e plotë të gjobave e kamatëvonesave, nëse paguhet 75% e mbetur e borxhit deri më 31 dhjetor 2026.
Ndërkohë, për detyrimet e krijuara gjatë viteve 2020-2024 nuk parashikohet ulje e principalit, por tatimpaguesit mund të përfitojnë fshirjen e plotë të gjobave dhe kamatëvonesave nëse shlyejnë 100% të detyrimit bazë deri në fund të këtij viti.
Skema konsiderohet një nga ndërhyrjet më të rëndësishme fiskale të viteve të fundit, pasi synon të rikthejë në formalitet një numër të konsiderueshëm subjektesh që kanë akumuluar borxhe tatimore, duke u dhënë atyre mundësinë të mbyllin detyrimet me kosto dukshëm më të ulët se ajo e parashikuar në regjimin normal të mbledhjes së borxheve.
Administrata Tatimore u bën thirrje të gjithë tatimpaguesve të verifikojnë situatën e tyre në sistemin elektronik e-Filing dhe të kryejnë pagesat brenda afateve të përcaktuara, për të mos humbur mundësinë e përfitimit nga lehtësitë e parashikuara në ligj.
Afatet kryesore
• Deri më 30 qershor 2026: Fshirje e 50% të principalit dhe 100% e gjobave e kamatëvonesave për detyrimet e viteve 2015-2019.
• Deri më 31 dhjetor 2026: Fshirje e 25% të principalit dhe 100% e gjobave e kamatëvonesave për detyrimet e viteve 2015-2019.
• Deri më 31 dhjetor 2026: Fshirje e plotë e gjobave dhe kamatëvonesave për detyrimet e viteve 2020-2024, pas pagesës së plotë të principalit. /ekofin.al
