Evropa urdhëroi Google që t’ua lehtësojë përdoruesve të telefonave Android thirrjen e asistentëve të inteligjencës artificiale të zhvilluar nga kompanitë rivale.
Zyrtarët thanë në një deklaratë se masa është hartuar për të ndihmuar kompanitë e tjera të konkurrojnë me Google, e cila ka një pozicion dominues në tregun europian të telefonave inteligjentë.
“Vendimi ynë do të ndihmojë konkurrentët më të vegjël, motorët e kërkimit ose asistentët e inteligjencës artificiale që të konkurrojnë dhe t’u ofrojnë përdoruesve më shumë zgjedhje, duke mbrojtur njëkohësisht privatësinë e tyre”, tha Teresa Ribera, zëvendëspresidente ekzekutive e Komisionit Europian për tranzicionin e pastër, të drejtë dhe konkurrues.
Google tha se asistentët e jashtëm të inteligjencës artificiale mund të kenë tashmë akses në funksionet e telefonave Android, pasi t’u nënshtrohen kontrolleve nga prodhuesit.
“Ky vendim për Android kërcënon sigurinë e pajisjeve, pasi u jep aplikacioneve të jashtme leje të ndjeshme dhe të fuqishme pa këto masa mbrojtëse”, tha Kent Walker, presidenti i Google për çështjet globale.
Gjiganti i kërkimit dhe reklamave zotëron Gemini, një nga modelet kryesore të inteligjencës artificiale. Gjatë muajve të fundit, kompania ka mbetur pas rivalëve OpenAI dhe Anthropic.
Megjithatë, Google ka mundësinë ta integrojë inteligjencën e saj artificiale në aplikacionet ekzistuese, si Gmail dhe Maps, çka mund t’i japë një avantazh të konsiderueshëm në raport me konsumatorët./Përshtati nga The Washington Post, ekofin.al
