Monedha europiane ka zbritur për herë të parë këtë vit nën pragun e 95 lekëve, duke konfirmuar se qershori ka nisur me një valë të re zhvlerësimi të euros ndaj lekut shqiptar.
Sipas kursit zyrtar të Bankës së Shqipërisë, euro u këmbye sot me 94.96 lekë, me një rënie të mëtejshme prej 0.09 lekësh krahasuar me ditën e mëparshme. Në të njëjtën kohë, edhe dollari amerikan vijoi të humbasë terren, duke zbritur në 81.96 lekë.
Lëvizja e fundit e euros vjen në një periudhë kur faktorët sezonalë po bëhen gjithnjë e më të dukshëm në tregun valutor. Muaji qershor shënon tradicionalisht fillimin e hyrjeve më të mëdha valutore nga turizmi, emigrantët dhe investimet e lidhura me sezonin veror, duke rritur ofertën e euros në treg dhe duke ushtruar presion mbi kursin e këmbimit.
Ekspertët e tregut presin që kjo tendencë të vijojë edhe gjatë javëve në vazhdim. Përvoja e viteve të fundit ka treguar se periudha qershor-gusht shoqërohet me forcim të lekut, ndërsa kulmi i hyrjeve valutore zakonisht arrihet gjatë muajve korrik dhe gusht, kur numri i turistëve dhe fluksi i remitancave arrijnë nivelet më të larta.
Në vitet e fundit, Shqipëria ka përjetuar një rritje të fortë të të ardhurave nga turizmi, të cilat janë kthyer në një nga burimet kryesore të valutës së huaj në ekonomi. Vetëm gjatë vitit të kaluar vendi regjistroi një numër rekord vizitorësh, ndërsa pritshmëritë për sezonin turistik 2026 mbeten optimiste.
Përveç turizmit, ndikim në forcimin e lekut vazhdojnë të japin edhe remitancat e emigrantëve, investimet e huaja direkte dhe flukset që lidhen me sektorin e ndërtimit dhe pasurive të paluajtshme.
Megjithatë, zhvlerësimi i euros ka efekte të ndryshme në ekonomi. Nga njëra anë, ai ul kostot e importeve dhe ndihmon në frenimin e inflacionit, por nga ana tjetër redukton të ardhurat në lekë të eksportuesve, bizneseve që operojnë me kontrata në euro dhe familjeve që marrin remitanca nga jashtë.
Me kursin që tashmë ka thyer nivelin e 95 lekëve, vëmendja e tregut është përqendruar tek ecuria e muajve të verës, ku nuk përjashtohet mundësia që monedha europiane të zbresë edhe më tej, nëse flukset valutore nga turizmi dhe emigracioni rezultojnë më të larta se pritshmëritë. /ekofin.al
