Sistemi elektroenergjetik shqiptar ka shënuar një përmirësim të ndjeshëm gjatë muajit maj 2026, si në drejtim të prodhimit vendas të energjisë ashtu edhe të përballimit të kërkesës në rrjet. Të dhënat e Operatorit të Sistemit të Transmetimit (OST) tregojnë se prodhimi vendas i energjisë elektrike u rrit me ritme shumë më të larta sesa konsumi, duke reflektuar kushtet e favorshme hidrike dhe zgjerimin e kapaciteteve fotovoltaike.
Sipas OST, ngarkesa totale në sistemin e transmetimit arriti në 569.5 GWh në muajin maj 2026, nga 530.3 GWh në të njëjtën periudhë të vitit të kaluar. Kjo përfaqëson një rritje prej 7.4%, duke treguar zgjerimin e kërkesës për energji në ekonomi dhe konsum më të lartë nga familjet dhe bizneset.
Megjithatë, zhvillimi më domethënës është ai i prodhimit vendas. Në maj 2026, prodhimi total i energjisë elektrike arriti në 811,901 MWh, krahasuar me 568,260 MWh në maj 2025. Rritja rezulton në rreth 42.9%, ose afro 244 mijë MWh më shumë energji të prodhuar brenda vendit.
Pesha kryesore e këtij prodhimi vijon të mbahet nga hidrocentralet me rezervuar. Këto centrale prodhuan 474,735 MWh në maj 2026, nga 357,442 MWh një vit më parë, me një rritje prej 32.8%.
Rritje edhe më të fortë shënuan hidrocentralet me derivacion, prodhimi i të cilëve arriti në 235,029 MWh, kundrejt 145,405 MWh në maj 2025. Në terma vjetorë, kjo kategori regjistroi një zgjerim prej rreth 61.6%, duke dhënë një kontribut të rëndësishëm në rritjen e prodhimit vendas.
Një tjetër tregues i transformimit gradual të miksit energjetik është zgjerimi i energjisë diellore. Prodhimi nga centralet fotovoltaike arriti në 102,137 MWh gjatë muajit maj, nga 62,513 MWh në të njëjtën periudhë të vitit të kaluar. Rritja prej mbi 63% konfirmon ritmin e shpejtë të investimeve në këtë segment dhe rëndësinë gjithnjë në rritje të energjisë së rinovueshme jo-hidro në sistem.
Ndërkohë, prodhimi nga termocentralet rezultoi zero në muajin maj 2026, ndërsa një vit më parë ishte 2,900 MWh. Kjo tregon se sistemi ka arritur të mbështetet tërësisht në burimet e rinovueshme gjatë kësaj periudhe, pa pasur nevojë për prodhim termik.
Të dhënat e OST tregojnë se në maj 2026, hidrocentralet me rezervuar përbënin rreth 58.5% të prodhimit total vendas, hidrocentralet me derivacion rreth 28.9%, ndërsa energjia fotovoltaike afro 12.6%. Krahasuar me një vit më parë, pesha e energjisë diellore është rritur ndjeshëm, duke reflektuar hyrjen në operim të kapaciteteve të reja dhe rritjen e prodhimit nga parqet ekzistuese. /ekofin.al
