Pas dorëheqjes së ish-CEO-së së Astronomer, Andy Byron, pasi u përfshi në një skandal me kamerën “kiss-cam”, dy avokatë kanë treguar për Mirror US nëse ai ka baza ligjore për të paditur.
Drejtuesi i martuar i kompanisë së teknologjisë u kap nga “kiss-cam” gjatë një koncerti të Coldplay në stadiumin Gillette në Foxboro, Massachusetts. Ai u pa me krahët rreth Kristin Cabot, drejtoreshë e Burimeve Njerëzore në Astronomer – por më e rëndësishmja, jo bashkëshortja e tij. Pas viralizimit të videos, kompania Astronomer publikoi një deklaratë dhe Byron dha dorëheqjen.
Me gjithë polemikat që e rrethojnë, nuk do të ishte e habitshme që Byron të mendonte për ndonjë veprim ligjor. Mirror US kontaktoi dy avokatë për të mësuar nëse Byron ka ndonjë bazë për të paditur grupin britanik Coldplay.
“Çdo padi nga Byron do të rrëzohej menjëherë,” tha Ron Zambrano nga kompania West Coast Employment Lawyers me seli në Los Anxhelos. “Ai nuk ka asnjë bazë për të paditur.”
Ai shtoi: “Së pari, ajo do të rrëzohej menjëherë si kufizim ndaj lirisë artistike dhe të drejtës së Coldplay për shprehje kreative gjatë performancave të tyre. Së dyti, Byron dhe Cabot hoqën dorë nga çdo e drejtë për privatësi kur vendosën të merrnin pjesë në një ngjarje publike, prandaj shfaqja publike e afeksionit është përgjegjësi e tyre, jo e Coldplay. Ata thjesht u kapën në kamera.”
Tre Lovell, avokat civil dhe për çështje argëtimi nga Lovell Firm, ra dakord me Zambranon. Ai tha:
“CEO Andy Byron nuk ka asnjë rrugë ligjore kundër Coldplay për faktin që u shfaq në ekranin e madh.”
“Sapo del në publik, nuk ke më të drejtë privatësie për veprimet e tua,” shtoi ai. “Njerëzit janë të lirë të të fotografojnë apo të të regjistrojnë.”
“Ajo që nuk lejohet është që të përdoren pamjet për qëllime tregtare pa lejen tënde ose të të shpifin apo të të paraqesin në mënyrë të pavërtetë.”
Lovell përfundoi: “Fakti që CEO-ja u kap duke bërë diçka të turpshme apo joetike në publik, është problemi i tij.”
As Byron dhe as Cabot nuk kanë bërë ende ndonjë koment publik për videon, por këngëtari i Coldplay, Chris Martin, duket se ironizoi situatën në koncertin e radhës. Ai nuk e përmendi drejtpërdrejt incidentin, por u tha spektatorëve:
“Ndoshta do të përfundoni në ekranin gjigant. Ju lutem, nëse nuk keni bërë grimin, bëjeni tani!”/Përshtati nga The Mirror, ekofin.al
