Tatimet njoftojnë se kanë nisur implementimin e deklaratës së re DIVA 2025, në zbatim të ligjit të Tatimit mbi të Ardhurat. Ashtu si edhe herët e tjera, Deklarata Personale e të Ardhurave Vjetore, ose DIVA, është e paraplotësuar në sistemin e tatimeve e-filing, ndaj edhe për të realizuar ndryshimet e nevojshme, në bazë të ligjit, tatimeve u duhet të zhvillojnë më tej sistemin, si edhe të realizojnë testet përkatëse.
Një nga risinë e ligjit, që nis të aplikohet me DIVA 2025, e cila duhet të dorëzohet brenda marsit 2026, është zbritja prej 48.000 lekë nga baza e tatueshme si kompesim për çdo fëmijë nën 18 vjeç dhe shpenzimet arsimore.
Kjo, pasi ligji “Për tatimin mbi të ardhurat” përfshin edhe zbritjen e shpenzimeve për arsim deri në 100 mijë lekë në vit për individët me të ardhura më pak se 1,2 milionë lekë. Sipas tatimeve, shuma e vlerësuar për rimbursim për këto zbritje për të gjithë personat që do të plotësojnë dhe dorëzojnë DIVA 2025 vlerësohet në 20 milionë euro.
Sipas të dhënave më të fundit të publikuara nga tatimet, DIVA 2024 u dorëzua brenda afatit, datës 1 prill, nga 127.381 individë, nga 143.369 individë që kishin detyrimin ligjor për të deklaruar. Tatimet kanë paralajmëruar se personat që nuk e kanë dorëzuar deklaratën përballen me gjoba, kamatëvonesa, e deri në rivlerësim tatimor, sipas parashikimeve ligjore në fuqi.
Detyrimin e kishin të gjithë ata individë rezidentë dhe jo rezidentë, që gjatë vitit 2024:
- kishin pagë bruto vjetore mbi 1.2 milionë lekë;
- ishin të dypunësuar, të paktën për një periudhë tatimore brenda vitit;
- realizuan të ardhura nga burime të tjera mbi 50 mijë lekë në vit për të cilat nuk është mbajtur tatimi në burim.
Për herë të parë do deklaroheshin edhe të ardhurat nga platformat Booking dhe Aibnb. Sipas verifikimeveparaprake të administratës tatimore, rezultuan rreth 33 milionë euro të ardhura të gjeneruara nga individët nëpërmjet platformave të rrjeteve sociale META, Youtube dhe Google që duhen të deklaroheshin te DIVA. /ekofin.al
