Bashkitë kanë edhe një javë kohë të dorëzojnë planin e tyre për daljen nga borxhet e prapambetura.
Ministri i Financave, Petrit Malaj, në një deklaratë publike të premten kërkoi nga bashkitë me stok detyrimesh të prapambetura të hartojnë dhe miratojnë planet e shlyerjes së tyre deri më 20 korrik.
Bashkitë me vështirësi financiare do të duhet që planin e rehabilitimit financiar ta miratojnë dhe t’i dorëzojnë në Ministrinë e Financave, e cila do të ndjekë zbatimin e tyre brenda një afati 12-mujor.
Ekofin.al ka analizuar të dhënat zyrtare për stokun e detyrimeve deri në mars 2025 mbi bazën e të cilave rezulton se nga 4.1 miliardë lekë detyrime të prapambetura nga institucionet e qeverisjes vendore, Bashkia e Tiranës udhëheq listën me 1.26 miliardë lekë. Nga ky stok, 685.9 milionë lekë detyrime rrjedh nga zëri “vendime gjyqësore”, ndërsa 438.6 milionë lekë nga zëri “të tjera” ku përfshihen energjia elektrike, paga, shpronësime, transferta për individët, subjektet etj.
Pas Tiranës, është Bashkia e Kavajës, e cila ndër vite mbart një stok të konsiderueshëm. Deri në mars të vitit 2025 detyrimi arrin në shifrën 752.6 milionë lekë, ku peshën më të madhe e mban zëri “të tjera” me 492.7 milionë lekë.
Bashkia e tretë me shifrën më të lartë të detyrimeve të prapambetura është Bashkia Pogradec me 254 milionë lekë, e ndjekur nga Bashkia Dimal me 169 milionë lekë, ku zëri “investime” rezulton 98.6 milionë lekë, Bashkia Rrogozhinë me 161 milionë lekë, ndërsa Bashkia Vorë ka 153.5 milionë lekë detyrime të prapambetura.
Po kështu, edhe Bashkitë Dibër dhe Cërrik rezulton me detyrime të prapambetura mbi 100 milionë lekë, saktësisht 126.5 milionë dhe 123.7 milionë lekë.
Të dhënat e publikuara nxjerrin në pah barrën e lartë financiare me të cilën përballen disa bashki në vend, që rëndojnë mbi aftësinë e tyre për të ofruar shërbime publike dhe për të realizuar investime. Në këtë kontekst, thirrja e Ministrisë së Financave për hartimin e planeve të shlyerjes dhe rehabilitimit financiar brenda një afati të përcaktuar synon vendosjen e disiplinës fiskale dhe rikthimin e stabilitetit në financat e qeverisjes vendore./ekofin.al
