Shumica e partive në parlamentin danez kanë deklaruar se mbështesin vendosjen e një kufiri minimal moshe prej 15 vjeç për përdorimin e rrjeteve sociale. Ende nuk dihet se cilat platforma do të preken nga ky vendim.
Qeveria daneze njoftoi të premten se ka arritur një marrëveshje për vendosjen e një kufiri minimal moshe prej 15 vjeç në disa platforma të rrjeteve sociale. Ky hap vjen pas thirrjes së kryeministres Mette Frederiksen në fjalimin e saj hapës në parlament muajin e kaluar, për të kufizuar përdorimin e rrjeteve sociale nga fëmijët, për shkak të shqetësimeve mbi shëndetin mendor të të rinjve. Një shumicë partish parlamentare kanë shprehur mbështetjen e tyre për këtë plan.
“Si një nga vendet e para në BE, Danimarka po ndërmerr një hap historik drejt vendosjes së kufijve të moshës për rrjetet sociale,” tha Ministrja e Digjitalizimit në një deklaratë. “Kjo bëhet për të mbrojtur fëmijët dhe të rinjtë në botën digjitale.”
“Sipas parimit, fëmijët nën moshën 15 vjeç nuk duhet të kenë qasje në platforma që mund t’i ekspozojnë ndaj përmbajtjeve apo veçorive të dëmshme,” shtohet në deklaratë.
Ministria nuk ka përcaktuar ende se cilat platforma do të përfshihen apo si do të zbatohet ndalimi.
Megjithatë, përjashtime mund të bëhen nëse prindërit mendojnë se fëmijët e tyre duhet të kenë akses më herët. Sipas deklaratës, prindërit mund të japin pëlqimin që fëmijët e tyre, që janë të paktën 13 vjeç, të përdorin rrjetet sociale.
Çfarë masash të tjera parashikohen?
Marrëveshja përfshin gjithashtu ndarjen e 160 milionë koronave daneze (rreth 21.4 milionë euro; 24.8 milionë dollarë) për 14 iniciativa që synojnë forcimin e mbrojtjes së fëmijëve dhe të rinjve online dhe krijimin e një kuadri më të mirë për jetën e tyre digjitale.
Në kuadër të marrëveshjes, do të forcohet mbikëqyrja e Aktit Evropian të Shërbimeve Digjitale (Digital Services Act) dhe do të ndahen fonde për të mbështetur zhvillimin e platformave alternative të rrjeteve sociale. Po ashtu, do të intensifikohen përpjekjet për të luftuar marketingun e paligjshëm nga influencerët.
Një koalicion ligjvënësish deklaroi se “është e qartë se fëmijët nuk duhet të lihen vetëm në një botë dixhitale, ku përmbajtja e dëmshme dhe interesat komerciale luajnë një rol të madh në formësimin e përditshmërisë dhe fëmijërisë së tyre.”
“Fëmijët dhe të rinjtë kanë gjumin e shqetësuar, humbasin qetësinë dhe përqendrimin, dhe përballen me presione të shtuara nga marrëdhënie digjitale ku të rriturit nuk janë gjithmonë të pranishëm,” thuhet në deklaratë. “Kjo është një zhvillim që asnjë prind, mësues apo edukator nuk mund ta ndalë i vetëm.”
“Danimarka po udhëheq tashmë Evropën me një kufi kombëtar moshe për rrjetet sociale dhe me një përpjekje të koordinuar për të forcuar mirëqenien digjitale të fëmijëve dhe të rinjve,” tha Ministrja e Digjitalizimit, Caroline Stage.
“Ne po marrim një qëndrim të domosdoshëm kundër një zhvillimi ku platformat e mëdha teknologjike kanë pasur liri të plotë në dhomat e fëmijëve për shumë gjatë.”
Australia në krye të ndalimit të rrjeteve sociale për fëmijët
Plani danez ndjek shembullin e Australisë, e cila në dhjetor do të bëhet vendi i parë në botë që ndalon rrjetet sociale për fëmijët, duke vendosur moshën minimale në 16 vjeç.
Në shtator, Presidentja e Komisionit Evropian, Ursula von der Leyen, deklaroi në një forum të Kombeve të Bashkuara në Nju Jork se ishte “e frymëzuar” nga vendimi “me sens të përbashkët” i Australisë për të vendosur kufizime të tilla.
Legjislacioni australian parashikon gjoba deri në 50 milionë dollarë australianë (rreth 30 milionë euro; 32.3 milionë dollarë) për platformat që lejojnë fëmijët nën 16 vjeç të hapin llogari.
Të mërkurën, Australia njoftoi se kishte shtuar Reddit dhe shërbimin e transmetimit të drejtpërdrejtë Kick në listën e saj të platformave që duhet të ndalojnë fëmijët nën 16 vjeç të krijojnë llogari.
Këto platforma do t’i bashkohen Facebook, Instagram, Snapchat, Threads, TikTok, X dhe YouTube në përballjen me një detyrim ligjor unik në botë për të mbyllur llogaritë e fëmijëve australianë më të vegjël më 10 dhjetor, sipas ministres së Komunikimeve Anika Wells./DW
