Rritja e çmimeve, zvogëlimi i peshës dhe ndryshimi i shijes po e transformojnë në heshtje çokollatën që konsumatorët kanë njohur prej vitesh. Produktet festive si Celebrations, Terry’s Chocolate Orange apo Cadbury’s Dairy Milk sot janë më të vogla, më të shtrenjta dhe, sipas shumë konsumatorëve, më pak “çokollatë” se më parë, shkruhet në artikullin e BBC.
Prodhuesit pranojnë se po kërkojnë mënyra për të ulur kostot, përmes strategjive të njohura si “shrinkflation” – reduktim i madhësisë pa ulje çmimi – dhe “skimpflation”, ku përbërësit e shtrenjtë si kakaoja zëvendësohen pjesërisht me alternativa më të lira. Në disa raste, ndryshimet në receta kanë qenë aq të thella sa produkte të caktuara nuk plotësojnë më kriteret ligjore për t’u quajtur çokollatë.
Sipas të dhënave të tregut, çmimet e çokollatës në supermarketet britanike janë rritur mesatarisht me mbi 18% krahasuar me vitin e kaluar. Cadbury’s Dairy Milk sot peshon 10% më pak, por kushton 48% më shumë; Mars Celebrations është zvogëluar me 23% dhe është shtrenjtuar me 44%; ndërsa Terry’s Chocolate Orange është bërë 8% më e vogël, me një rritje çmimi prej 51%.
Shkaku kryesor i këtij trendi lidhet me rritjen e kostove të lëndëve të para. Ndryshimet klimatike kanë dëmtuar rendimentet e kakaos në Afrikë, ndërsa reshjet ekstreme dhe thatësirat në vende si India, Brazili dhe Tajlanda kanë përkeqësuar situatën globale. Edhe qumështi është shtrenjtuar ndjeshëm për shkak të kostove më të larta të ushqimit për bagëtitë, energjisë dhe punës.
Ndërsa kompanitë këmbëngulin se ndryshimet janë të pashmangshme, konsumatorët shprehin pakënaqësi, veçanërisht për mungesën e transparencës. Ekspertët e mbrojtjes së konsumatorit paralajmërojnë se surprizat e padëshiruara lënë “shije të keqe”, sidomos në prag festash. Në këtë realitet të ri, këshilla që dëgjohet gjithnjë e më shpesh është e thjeshtë: më pak sasi, por më shumë cilësi.
