Çmimet e naftës u rritën në Europë, pasi Presidenti amerikan Donald Trump deklaroi se do të shkurtonte afatin 50-ditor që i kishte dhënë Presidentit rus Vladimir Putin për të arritur një marrëveshje paqeje për Ukrainën.
Nafta bruto amerikane (WTI) u rrit me rreth 2.2%, duke arritur në 66.50 dollarë për fuçi, ndërsa nafta Brent u rrit me rreth 2% në 69.80 dollarë, sipas të dhënave të orës 15:00 CEST.
Trump i kishte dhënë Putinit një afat 50-ditor në korrik, duke kërcënuar me vendosjen e një tarife 100% ndaj Rusisë nëse Moska nuk i jepte fund luftës në Ukrainë. “Jam i zhgënjyer nga Presidenti Putin, shumë i zhgënjyer. Kështu që do të duhet të rishikojmë dhe do ta shkurtoj atë afat prej 50 ditësh,” tha Trump të hënën për gazetarët në Skoci. “Besoj se e di tashmë çfarë do të ndodhë.”
Presidenti amerikan ndodhej në prag të një takimi me Kryeministrin britanik Keir Starmer.
Rritja e çmimeve të naftës kishte nisur më herët gjatë ditës, si reagim ndaj lajmit për një marrëveshje tregtare mes BE-së dhe SHBA-së, të shpallur të dielën.
Sipas marrëveshjes, BE-ja do të blejë energji amerikane në vlerën e 750 miliardë dollarëve gjatë tre viteve të ardhshme, përfshirë naftë, gaz natyror të lëngshëm (LNG) dhe energji bërthamore.
Kjo marrëveshje nënkupton që BE-ja do të përballet me një tarifë 15% për shumicën e mallrave të saj kur të përfundojë afati i tarifave të Trump më 1 gusht – më pak se niveli i kërcënuar prej 30%. Lajmi ndikoi edhe në bursat europiane, të cilat shënuan rritje të hënën paradite përpara se të stabilizoheshin pasdite.
Gjatë këtij viti, kërcënimet e Trump për tarifa kanë ndikuar negativisht në çmimet e naftës, pasi investitorët parashikonin një ngadalësim të mundshëm ekonomik që do të ulte kërkesën për energji. Por në anën tjetër, rreziqet gjeopolitike e kanë nxitur rritjen e çmimeve, si në rastin e sulmeve të SHBA-së ndaj objekteve bërthamore të Iranit në qershor, të cilat sollën një kërcim të çmimeve të naftës.
Ndërkohë, një takim i komitetit të OPEC+ po mbahet të hënën, ku do të diskutohet politika e prodhimit për muajin shtator. Si Agjencia Ndërkombëtare e Energjisë ashtu edhe Administrata Amerikane e Informacionit të Energjisë parashikojnë një suficit të fortë të furnizimit me naftë vitin e ardhshëm, me ofertën që tejkalon kërkesën.
Pas marrëveshjes me BE-në, Uashingtoni tashmë po përgatitet për negociata me Kinën. Sekretari amerikan i Thesarit Scott Bessent dhe Përfaqësuesi i Tregtisë Jamieson Greer janë në takim me zyrtarët kinezë, përfshirë Zëvendëskryeministrin kinez He Lifeng, të hënën në Stokholm.
SHBA dhe Kina kishin rënë dakord të ulnin përkohësisht tarifat reciproke gjatë një periudhe 90-ditore armëpushimi tregtar, që skadon më 12 gusht. Shpresat janë që kjo periudhë të zgjatet, ndërsa aktualisht Kina takson mallrat amerikane me 10%, dhe SHBA me 30% ndaj mallrave kineze./Përshtati nga Euronews, ekofin.al
