Këtë javë, Shtetet e Bashkuara njoftuan një ndryshim të paprecedentë në kalendarin e vaksinimit, duke hequr gjashtë vaksina të rekomanduara për fëmijët. Ja çfarë duhet të dini.
Shtetet e Bashkuara ndërmorën të hënën hapin e paprecedentë të uljes së numrit të vaksinave që rekomandon për çdo fëmijë — një veprim që, sipas grupeve kryesore mjekësore, do të minojë mbrojtjen kundër gjashtë sëmundjeve.
Ndryshimi, i cili hyri në fuqi menjëherë, do të thotë se Qendrat për Kontrollin dhe Parandalimin e Sëmundjeve (CDC) në SHBA tani do të rekomandojnë që të gjithë fëmijët të vaksinohen kundër 11 sëmundjeve, nga 17 që ishin më parë.
Ajo që nuk rekomandohet më gjerësisht është mbrojtja kundër gripit, rotavirusit, hepatitit A, hepatitit B, disa formave të meningjitit apo RSV-së. Në vend të kësaj, mbrojtja kundër këtyre sëmundjeve rekomandohet vetëm për grupe të caktuara që konsiderohen me rrezik të lartë, ose kur mjekët e sugjerojnë në kuadër të asaj që quhet “vendimmarrje e përbashkët”.
Zyrtarë të administratës Trump thanë se rishikimi, një hap i kërkuar prej kohësh nga Sekretari i Shëndetësisë Robert F. Kennedy Jr., nuk do të rezultojë në humbje të aksesit për familjet që duan vaksinat dhe se sigurimet do të vazhdojnë t’i mbulojnë ato. Por ekspertët mjekësorë thanë se vendimi krijon konfuzion për prindërit dhe mund të rrisë sëmundjet e parandalueshme.
Ndryshimet vijnë në një kohë kur normat e vaksinimit në SHBA kanë rënë dhe përqindja e fëmijëve me përjashtime ka arritur nivelin më të lartë ndonjëherë, sipas të dhënave qeveritare. Në të njëjtën kohë, po rriten rastet e sëmundjeve që mund të parandalohen me vaksina, si fruthi dhe kolla e mirë.
Kërkuar nga politikanët, kritikuar nga mjekët
Departamenti amerikan i Shëndetësisë dhe Shërbimeve Njerëzore tha se rishikimi erdhi si përgjigje ndaj një kërkese nga Presidenti Donald Trump në dhjetor. Trump i kërkoi agjencisë të shqyrtonte se si vendet e tjera të zhvilluara i qasen rekomandimeve për vaksinat dhe të merrte në konsideratë rishikimin e udhëzimeve amerikane në përputhje me to.
Departamenti tha se krahasoi rekomandimet e SHBA-së me ato të 20 vendeve të tjera të zhvilluara dhe zbuloi se SHBA ishte “një përjashtim global (…) si për numrin e sëmundjeve të mbuluara në kalendarin rutinë të vaksinimit të fëmijëve, ashtu edhe për numrin total të dozave të rekomanduara”.
Zyrtarët e agjencisë e paraqitën ndryshimin si një mënyrë për të rritur besimin e publikut, duke rekomanduar vetëm vaksinat më të rëndësishme për fëmijët.
“Ky vendim mbron fëmijët, respekton familjet dhe rindërton besimin në shëndetin publik,” tha Kennedy në një deklaratë.
Qeveria amerikane veçoi në mënyrë të posaçme Danimarkën, e cila rekomandon 10 vaksina për fëmijët, si një model për SHBA-në. Por pediatrët e hodhën poshtë këtë krahasim si të papërshtatshëm dhe të rrezikshëm.
Dr. Sean O’Leary nga Akademia Amerikane e Pediatrisë tha se vendet i përcaktojnë me kujdes rekomandimet për vaksinat bazuar në nivelin e sëmundjeve në popullatat e tyre dhe në sistemet shëndetësore që kanë.
“Nuk mund të kopjosh dhe ngjitësh shëndetin publik, dhe pikërisht këtë duket se po bëjnë këtu,” tha O’Leary. “Fjalë për fjalë, shëndeti dhe jeta e fëmijëve janë në rrezik.”
“Nuk ka asnjë arsye shkencore për të besuar se rekomandimet e Danimarkës për vaksinat janë më të sigurta,” shtoi ai. “Ajo që dimë është se sa herë që një fëmijë mbetet pa imunizimet e rekomanduara, ai është në rrezik për këto sëmundje që ne mund t’i parandalojmë me një ndërhyrje shumë të thjeshtë, të sigurt dhe efektive.”
Shumica e vendeve me të ardhura të larta rekomandojnë vaksinimin kundër 12 deri në 15 patogjenëve seriozë, sipas një rishikimi të fundit nga Vaccine Integrity Project, një grup që punon për të mbrojtur përdorimin e vaksinave.
Franca sot rekomandon që të gjithë fëmijët të vaksinohen kundër 14 sëmundjeve, krahasuar me 11 që SHBA tani do të rekomandojë për çdo fëmijë sipas kalendarit të ri.
Grupet kryesore mjekësore po qëndrojnë te rekomandimet e mëparshme për vaksinat, duke thënë se nuk ka asnjë provë të re shkencore që të justifikojë ndryshimin — dhe shprehin shqetësimin se këshillat kontradiktore do t’i lënë më shumë fëmijë të cenueshëm ndaj sëmundjeve të parandalueshme ose vdekjes./Përshtati nga Euronews, ekofin.al
