Autoriteti Rrugor Shqiptar ka shpallur procedurën e prokurimit për ndërtimin e ByPass-it të Sarandës, Faza I, një investim i rëndësishëm për infrastrukturën rrugore dhe urbane të qytetit bregdetar.
Ky projekt synon përmirësimin e qarkullimit dhe devijimin e trafikut tranzit larg zonës qendrore të qytetit, në funksion të lehtësimit të trafikut dhe zhvillimit të qëndrueshëm urban.
Fondi limit i kontratës është afërsisht 2 miliardë lekë (1,999,869,151.44 lekë pa TVSh)
Kohëzgjatja e zbatimit është 24 muaj dhe afati i fundit për dorëzimin dhe hapjen e ofertave është 25 gusht 2025, ora 11:00.
Rruga e re do të kalojë në një gjurmë kryesisht të re, me ndërhyrje në zona me akses ekzistues vetëm nëpërmjet rrugëve të ngushta dhe me strukturë të dobët. Projekti parashikon ndërtimin e një tuneli, urave nëse nevojitet, sistem kanalizimesh dhe ujësjellësi, ndriçim rrugor, trotuare e parkime, si dhe ndërtimin e mureve mbajtës për skarpatat.
Sipas ARRSH-së, terrenti i vështirë dhe sfidues i zonës ka kërkuar një analizë të detajuar nga projektuesit, të cilët kanë propozuar zgjidhje të përshtatura për kushtet specifike. Për shkak të natyrës së kompleksuar të punimeve, projekti nuk do të ndahet në lote, për të garantuar koordinim të saktë dhe cilësi në realizimin e tij.
Ky investim pritet të ketë një ndikim të rëndësishëm në zhvillimin urban dhe turistik të qytetit të Sarandës, si dhe të përmirësojë ndjeshëm sigurinë dhe komoditetin e qarkullimit për banorët dhe vizitorët./ekofin.al
Artikull i Ekofin.al
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke
cituar “Ekofin.al”, shoqëruar me linkun e artikullit origjinal.
