Buxheti ka regjistruar një suficit prej 70.3 miliardë lekësh, ose rreth 772 milionë euro me kursin aktual të këmbimit, gjatë periudhës janar-shtator 2026. Sipas të dhënave paraprake të Ministrisë së Financave, të ardhurat totale të buxhetit arritën në 626.6 miliardë lekë, ndërsa shpenzimet publike u regjistruan në 556.3 miliardë lekë.
Suficiti është krijuar në kushtet kur të ardhurat buxhetore janë rritur me ritme më të shpejta sesa shpenzimet, por edhe si pasojë e mosrealizimit të plotë të planit të shpenzimeve, veçanërisht të investimeve publike.
Të ardhurat rriten me 11.3%, shpenzimet me 7.5%
Gjatë periudhës janar-shtator 2026, të ardhurat totale të buxhetit u rritën me 63.7 miliardë lekë, ose 11.3%, krahasuar me të njëjtën periudhë të vitit të kaluar.
Ndërkohë, shpenzimet publike u rritën me rreth 39 miliardë lekë, ose 7.5%.
Diferenca ndërmjet ritmeve të rritjes së të ardhurave dhe shpenzimeve ka ndikuar në zgjerimin e suficitit buxhetor. Bazuar në këto të dhëna, suficiti rezulton rreth 24.7 miliardë lekë më i lartë se nëntëmujori i vitit 2025, kur diferenca ndërmjet të ardhurave dhe shpenzimeve ishte afërsisht 45.6 miliardë lekë.
Në terma relativë, kjo përfaqëson një rritje prej rreth 54% të suficitit krahasuar me të njëjtën periudhë të vitit të kaluar.
Të ardhurat buxhetore kanë realizuar 100.3% të planit të periudhës, ndërsa shpenzimet vetëm 92.8%, duke krijuar një diferencë të konsiderueshme ndërmjet arkëtimeve dhe pagesave të buxhetit.
Investimet publike, vetëm 75.2% e planit
Një nga faktorët që ka ndikuar në nivelin e suficitit është realizimi më i ulët i shpenzimeve kapitale, të cilat lidhen kryesisht me investimet publike.
Gjatë nëntëmujorit, shpenzimet kapitale arritën në 62.8 miliardë lekë, ose vetëm 75.2% të planit të periudhës.
Bazuar në këtë nivel realizimi, rezulton se rreth 20.7 miliardë lekë investime të planifikuara për nëntë muajt e parë të vitit nuk janë ekzekutuar.
Megjithatë, krahasuar me të njëjtën periudhë të vitit 2025, shpenzimet kapitale janë rritur me 3.1 miliardë lekë, ose 5.3%.
Kjo tregon se, ndonëse investimet publike janë rritur në terma vjetorë, ritmi i realizimit të tyre mbetet ndjeshëm poshtë planifikimit buxhetor.
Ndërkohë, shpenzimet korente arritën në 493.5 miliardë lekë, me një realizim prej 95.7% të planit. Krahasuar me nëntëmujorin e kaluar, ato janë rritur me 35.9 miliardë lekë, ose 7.8%.
Pjesën më të madhe të shpenzimeve korente e zënë fondet speciale, me 42.8% të totalit.
TVSH dhe tatimi mbi të ardhurat personale mbushën arkën e shtetit
Në anën e të ardhurave, një kontribut të rëndësishëm në rritjen e arkëtimeve kanë dhënë TVSH-ja dhe tatimi mbi të ardhurat personale.
Të ardhurat e mbledhura nga administrata tatimore arritën në 215.6 miliardë lekë, ose 21.9 miliardë lekë më shumë se nëntëmujori i vitit 2025.
Vetëm TVSH-ja neto e arkëtuar në vend solli 65 miliardë lekë, me një rritje prej 29% në krahasim me vitin e kaluar, ndërsa të ardhurat nga tatimi mbi të ardhurat personale arritën në 73 miliardë lekë, ose 15.5% më shumë.
Një tjetër burim i rëndësishëm ka qenë mbledhja e kontributeve të sigurimeve shoqërore dhe shëndetësore, të cilat arritën në 150.9 miliardë lekë.
Nga ana tjetër, administrata doganore arkëtoi 186.3 miliardë lekë, me një rritje prej 4.3% në krahasim me të njëjtën periudhë të vitit 2025. /ekofin.al
