Banka e Shqipërisë i ka shkuar deri në fund qasjes së saj për të kufizuar kreditimin nga institucionet financiare jobanka. BSH thekson në njoftim se këto ndryshime vijnë në kuadër të paketës së ndryshimeve rregullative për mbrojtjen e konsumatorëve, si reagim i Bankës së Shqipërisë ndaj disa çështjeve të hasura në tregun ku këto institucione operojnë.
Në konferencën për shtyp për komunikimin e politikës monetare, guvernatori Gent Sejko tha se qëllimi i ndryshimeve është një analizë më e mirë risku, me fokus mbrojtjen e kredimarrësve. Në këtë kuadër, subjektet kredidhënëse kanë detyrimin të vlerësojnë aftësinë paguese të kredimarrësit, bazuar në të dhëna dhe informacione të mjaftueshme, të sakta dhe të përditësuara, të cilat duhet të verifikohen në mënyrë të arsyeshme nga subjekti, për të shmangur kredidhënien e papërgjegjshme dhe vështirësinë financiare në shlyerjen e saj.
Por Banka e Shqipërisë nuk shpjegoi se përse kufizimi në kreditim po bëhej vetëm për institucionet financiare jobanka, kur linja kredie konsumatore kanë edhe bankat.
Institucionet financiare jobanka janë shprehur se masa të tilla do ta drejtojnë konsumatorin drejt kanaleve informale dhe në këtë mënyrë më shumë sesa ta mbrojnë, mund të kthehen në një dëm për të. Gjithashtu, kjo pritet të shoqërohet me impakt negativ në tkurrjen e kredidhënies.
Gjithashtu pjesë e ndryshimeve është edhe shtimi i një kërkese për subjektet financiare jobanka që blejnë kredi me probleme, të cilat në momentin e klasifikimit të portofolit të këtyre kredive nuk mund t’i klasifikojnë si kredi jo me probleme, nëse shlyerja e kësteve të kredive të blera bëhet nëpërmjet një kredie.
Por përsëri ndryshimet rregullatore të ndërmarra nga Banka e Shqipërisë nuk adresojnë çështjen e penaliteteve pa kufizim, që edhe ishte thelbi i skandalit me institucionet përmbarimore që kishin marrë portofolet e kredive të këqija.
Rregullat e reja do të hyjnë në fuqi në 1 janar 2025, por sipas Sejkos në rastet kur kërkohen ndërhyrje në sistemet informatike të institucioneve financiare jobanka, mund të ketë shtyrje të këtij afati. /ekofin.al
