Të dhënat e publikuara nga Banka e Shqipërisë tregojnë se bilanci i pagesave ka shfaqur teprica pozitive të llogarisë korrente dhe bilancit tregtar gjatë tremujorit të tretë të vitit 2024.
Suficiti i llogarisë korrente shënoi 349.9 milionë euro, duke u zvogëluar lehtë me 1.3% krahasuar me të njëjtën periudhë një vit më parë. Ai vlerësohet në masën 5.4% ndaj PBB-së, ose 0.7 pikë përqindje më i ulët se i njëjti tremujor vitin e kaluar.
Ngushtimi i suficitit korrent është shkaktuar nga rritja e importit të mallrave. Rritja vjetore e eksporteve totale shënoi vlerën 8.2% në tremujorin në fjalë, normë kjo e ngadalësuar krahasuar me tremujorin e kaluar (16.5%).
Kjo ecuri reflektoi tkurrjen me 2.9% të eksporteve të mallrave, si dhe rritjen më të ngadaltë të eksportit të shërbimeve (10.2% krahasuar me 17% tremujorin e kaluar). Importet totale u zgjeruan me 10.9%, normë kjo pak më e ulët se tremujori i kaluar.
Ngadalësimi i rritjes së importeve të shërbimeve (5.3% krahasuar me 19.8% tremujorin e kaluar) ka qenë nxitësi kryesor i kësaj ecurie, ndërkohë që rritja e importeve të mallrave shfaqet e qëndrueshme me 14.5%.
Sa i përket suficitit të përgjithshëm tregtar të dhënat tregojnë se u zvogëlua me 62.6 milionë euro, si pasojë e ndikimit të fortë nga rritja e importit të mallrave. Një tremujor më parë, balanca tregtare ruante vlera deficitare, të zgjeruara me 5.8% në terma vjetorë. Në raport me PBB-në, suficiti tregtar qëndron në nivelin 0.6%, i ngushtuar me 1.2 pikë përqindje krahasuar me të njëjtin tremujor vitin e kaluar.
Llogaria e të ardhurave parësore shënoi një deficit prej 21.1 milionë eurosh, duke u ngushtuar ndjeshëm krahasuar me një vit më parë. Prej disa tremujorësh, llogaria e të ardhurave parësore ka shfaqur vazhdimisht deficite në rënie, si pasojë e rritjes së shpejtë të të ardhurave hyrëse nga puna, krahasuar me rritjen e atyre dalëse nga investimet.
Teprica pozitive e të ardhurave dytësore u zgjerua me 9%, si pasojë e rritjes së remitancave me 12.7%. Në llogarinë financiare janë regjistruar flukse dalëse neto në vlerën 401.1 milionë euro. Flukset hyrëse të investimeve direkte shfaqën një rritje të ngadalësuar, ndërsa investimet e portofolit dhe investimet e tjera shfaqën rritje të mjeteve dhe pakësim të detyrimeve.
Mjetet e rezervës u rritën me 367.2 milionë euro. Stoku i tyre në fund të tremujorit të tretë të vitit 2024 llogaritet i mjaftueshëm për të mbuluar 6.7 muaj import mallrash dhe shërbimesh ose 339% të borxhit të jashtëm afatshkurtër bruto./ekofin.al
