Sir Keir Starmer pritet të shpallë të dielën pasdite njohjen e një shteti palestinez nga Mbretëria e Bashkuar.
Kryeministri kishte deklaruar në korrik se Britania do të ndryshonte qëndrim, përveç nëse Izraeli plotësonte disa kushte, përfshirë pajtimin për një armëpushim në Rripin e Gazës dhe angazhimin për një proces paqeje afatgjatë që çon në bashkëjetesën e një shteti palestinez përkrah Izraelit.
Udhëheqja izraelite e ka hedhur poshtë këtë që nga fillimi i luftës pas sulmit të Hamasit në jug të Izraelit më 7 tetor 2023, ku u vranë 1,200 persona dhe u morën peng 251 të tjerë.
Veprimi i kryeministrit ka nxitur kritika të ashpra nga qeveria izraelite, familjet e pengjeve të mbajtura në Gaza dhe disa konservatorë.
Kryeministri izraelit Benjamin Netanyahu kishte deklaruar më parë se njohja e një shteti palestinez “shpërblen terrorin”.
Vendimi për të njohur shtetin palestinez përfaqëson një ndryshim të madh në politikën e jashtme britanike, pasi qeveritë e njëpasnjëshme kishin thënë se njohja duhet të ndodhte si pjesë e një procesi paqeje dhe në një moment me ndikim maksimal.
Megjithatë, ministrat argumentojnë se ekziston një përgjegjësi morale për të vepruar në mënyrë që të mbahet gjallë shpresa për paqe afatgjatë.
Përpjekjet për të siguruar një armëpushim në Gaza – e lëre më një zgjidhje afatgjatë të konfliktit Izrael-Palestinë – kanë dështuar. Izraeli shkaktoi indinjatë ndërkombëtare së fundmi kur kreu një sulm ajror mbi një ekip negociator të Hamasit në Katar.
Burime qeveritare thanë se situata në terren është përkeqësuar ndjeshëm javët e fundit. Ata përmendën pamjet që tregonin urinë dhe dhunën në Gaza, të cilat Sir Keir më herët i kishte përshkruar si “të patolerueshme”.
Operacioni i fundit tokësor i Izraelit në qytetin e Gazës, i përshkruar nga një zyrtar i OKB-së si “katastrofik”, ka detyruar qindra mijëra njerëz të largohen.
Ky është ofensiva më e fundit izraelite në luftën pothuajse dyvjeçare, e cila ka zhvendosur pjesën më të madhe të popullsisë palestineze, ka shkatërruar infrastrukturën dhe ka vrarë të paktën 65,208 njerëz, sipas shifrave të ministrisë së shëndetësisë të drejtuar nga Hamasi.
Më herët këtë javë, një komision hetimor i Kombeve të Bashkuara arriti në përfundimin se Izraeli ka kryer gjenocid kundër palestinezëve në Gaza, gjë që Izraeli e denoncoi si “të shtrembëruar dhe të rremë”.
Ministrat kanë theksuar gjithashtu zgjerimin e vazhdueshëm të vendbanimeve izraelite në Bregun Perëndimor të pushtuar, të cilat janë të paligjshme sipas së drejtës ndërkombëtare, si një faktor kyç në vendimin për të njohur shtetësinë palestineze.
Sekretari i Drejtësisë David Lammy, i cili ishte ministër i jashtëm kur u propozua njohja, përmendi projektin kontrovers të vendbanimit E1 – për të cilin kritikët paralajmërojnë se do t’i jepte fund shpresave për një shtet palestinez të zbatueshëm dhe të pandërprerë – si dhe dhunën nga kolonët izraelitë në Bregun Perëndimor./Përshtati nga BBC, ekofin.al
