Pas vendimit të qeverisë, të botuar ditën e djeshme në Fletoren Zyrtare, për përcaktimin e çmimeve të reja të pullave fiskale, ku vihet re një ulje me gati 25% e çmimeve, ose në vlerë nominale midis 4-5 euro, reagojnë shoqatat e biznesit.
Presidenti i Biznes Albania, Luan Bregasi, në një intervistë të posaçme për ekofin.al, shprehet se përtej uljes së çmimit, ky ishte një moment që Qeveria të bënte një reflektim edhe më të fortë në lidhje me të gjithë procesin e pullave të mallrave të akcizës.
Së pari ishte momenti që qeveria shqiptare të bënte një lloj reflektimi dhe të merrte një vendim reflektues, për shkak se gati 11 vjet biznesi dhe industria e birrës në veçanti, kanë pasur në kurriz një barrë shumë të rëndë, për shkak të një koncesioni abuziv dhe korruptiv që bëri në atë periudhë Qeveria e Berishës, duke vendosur çmimin e pullës për birrën 22 euro për 1 mijë copë, i cili nëse krahasohej me vendet e rajonit ishte gati 10 herë më i lartë,” thotë Bregasi.
Sipas tij, ky ishte një moment për reflektim, edhe sepse qeveria aktuale e ka kundërshtuar në opozitë këtë koncesion, madje kishte premtuar që do ta anulonte me të ardhur në pushtet, gjë që në fakt nuk ndodhi, pasi ndoshta mund të kenë llogaritur kostot e larta që mund të krijoheshin në buxhet nga anulimi i një koncesioni.
Në lidhje me uljen me 25% të çmimit të pullave fiskale, z. Bregasi shprehet se si përqindje duket e madhe, por shifra e vendosur nga koncesionari në vitin 2012 ishte e paimagjinueshme dhe tani në finale përsëri çmimit mbetet i lartë.
“Si përqindje duket ulje e madhe, 25%, por shifra kur u vendos në vitin 2012 ishte shumë e madhe. Nëse Kosova e ka çmimin për 1 mijë pulla 2 euro, pse ta ketë Shqipëria tani 17 euro? Pastaj, ne si përfaqësues biznesi kishim kërkuar që edhe nëse çmimi do të qëndronte sërish i lartë, prodhimin e pullave ta merrte shteti, në mënyrë që me të ardhurat të fuqizohej buxheti, para që mund të kthehen më tej me investime në favor të bizneseve. Tani, edhe ndërmarrja e re që u krijua ka aksionare përsëri koncesionarin e mëparshëm dhe kjo hedh dyshime që ulja e çmimit që u bë tani nuk është lejuar të jetë më e madhe pikërisht nga kjo kompani,” shprehet për ekofin.al, Presidenti i Biznes Albania.
Çmimet e reja për pullat fiskale, do të jenë për produktet e duhanit 15.65 euro, për një mijë copë pa tvsh dhe taksat e tjera. Ndërkohë për verën do të jenë 25.04 euro, për birrën 17.22 euro, ndërsa për alkoolin 25.05 euro. Çmimi i aplikuar deri në fund të vitit të kaluar nga kompania koncesionare “Sicpa Security Solutions” Albania, sh.p.k, për produktet duhanit ishte 20 euro/1 mijë copë, duke përjashtuar këtu TVSH-në dhe taksat e tjetra. Për alkoolin, pulla e akcizës kushtonte 32 euro për 1 mijë copë dhe për birrën 22 euro për 1 mijë copë. /ekofin.al
