Bordi i Transparencës ka vendosur në mbledhjen e datës 3 prill 2026 rritjen e çmimit të karburanteve në tregun vendas, megjjthë ndërhyrjen e drejtpërdrejtë fiskale përmes reduktimit të akcizës. Vendimi vjen pas miratimit të një akti normativ, i cili parashikon uljen e nivelit të akcizës me 20%, që së bashku me efektin e TVSH-së përkthehet në një reduktim prej rreth 9.5 lekë për litër në çmimin final.
Sipas vendimit të Bordit, çmimi maksimal i shitjes me pakicë për gazoilin (standard SSH EN 590) është përcaktuar në 224 lekë/litër, ndërsa ai me shumicë në 212 lekë/litër. Ndërkohë, për benzinën, çmimi maksimal me pakicë është vendosur në 181 lekë/litër dhe 169 lekë/litër me shumicë.
Çmimet e reja do të hyjnë në fuqi menjëherë, që prej orës 20:00 të datës 3 prill, dhe do të mbeten të vlefshme deri në mbledhjen e ardhshme të Bordit, ku pritet të reflektohen zhvillimet e reja në tregjet ndërkombëtare të naftës.
Ndërhyrja e qeverisë përmes uljes së akcizës synon të amortizojë presionet e çmimeve në tregun vendas, në një kohë kur luhatjet në bursat ndërkombëtare kanë ushtruar ndikim të drejtpërdrejtë mbi koston e importit të karburanteve. Kjo masë pritet të ketë efekt të menjëhershëm në lehtësimin e kostove për konsumatorët dhe bizneset, veçanërisht në sektorët që varen ndjeshëm nga çmimi i naftës, si transporti dhe prodhimi.
Autoritetet kanë paralajmëruar gjithashtu operatorët e tregut për zbatim rigoroz të vendimit, duke theksuar se çdo shkelje do të shoqërohet me masa ndëshkuese deri në pezullim të aktivitetit. Mbikëqyrja do të kryhet në bashkëpunim mes Ministrisë së Ekonomisë dhe Inovacionit, Ministrisë së Financave dhe Ministrisë së Infrastrukturës dhe Energjisë.
