Mbi 10 mijë biznese kanë kaluar në filtrin e inspektimeve të Inspektoratit Shtetëror të Punës përgjatë vitit 2022. Referuar të dhënave zyrtare të siguruara, 135 subjekte janë gjobitur për shkak të shkeljes së Kodit të Punës. Të dhënat tregojnë se për vitin e kaluar janë 24.4 % më shumë masa administrative me gjobë krahasuar me vitin 2021. Vlera totale e gjobave të vendosura arrin në 28.3 milionë lekë, me një rritje me 23.6% krahasuar me vitin 2021.
Kontrollet në subjekte të kryera nga ky institucion fokusohen kryesisht tek inspektimet në punë për kushte punë të denja; për hetimin e aksidenteve në punē; mbrojtje e punëmarrësve në ushtrimin e profesionit të tyre; për ligjshmëri në zbatimin e kohëzgjatjes së punës; pagesës për punë të kryer konform legjislacionit; sigurimit të çdo punëmarrësi; higjienës dhe mirëqenies në vendin e punës; punësimit të ligjshëm të fëmijëve; për të drejtat dhe detyrimet që burojnë nga kontrata individuale e punës; për marrëveshjet kolektive në punë ; Si dhe për çështje të tjera, që lidhen ngushtë me marrëdhëniet e punës si dhe sigurinë dhe shëndetit në punë që kanë qenë pjesë e punës në çdo subjekt të kontrolluar.
Rritja e masave të ndërmarra ndaj subjekteve tregon mungesën e vëmendjes së tyre në drejtim të zbatimit të Kodit të Punës gjë që krijon padrejtësi tek punonjësit. Konstatohet gjithashtu një rritje e ankesave të punonjësve për mosrespektim të Kodit të Punës dhe mosmarrjen e masave të duhura për sigurinë në punë.
