Të dhënat e INSTAT për vitin 2023 tregojnë se sasia e qumështit të grumbulluar rezulton rreth 101 mijë tonë, duke shënuar rënie me 8%, krahasuar me 2022.
Gjatë kësaj periudhe, sasia e qumështit të lopës të grumbulluar është rreth 80 mijë tonë, duke pësuar rënie me rreth 7,6 %, krahasuar me vitin 2022, sasia e qumështit të deles regjistrohet në 13 mijë tonë, duke shënuar rënie me rreth 10,6 % dhe qumështi i dhisë është grumbulluar në rreth 8 mijë tonë, duke shënuar rënie me 8,2 %, krahasuar me vitin 2022.
Kjo rënie duket se ka ardhur për shkak të fenomenit të shpopullimit të fshatrave, rënies së numrit të gjedhëve dhe braktisjes së blegtorisë.
Nga sasia gjithsej e qumështit të grumbulluar, rreth 13 mijë tonë është përdorur për prodhimin e qumështit për konsum njerëzor, pjesa tjetër shkon për përpunim.
Paralelisht me qumështin ka një rënie edhe të nënprodukteve të prodhurava prej tij. Kështu, sasia e prodhuar e djathit gjithsej pësoi rënie me 7,7 %. Sasia e prodhuar e gjalpit gjithsej për vitin 2023 është rreth 608 ton, që gjithashtu ka pësuar një rënie me 174 ton në raport me një vit më parë.
Kjo situatë, me rënien e vazhdueshme të prodhimit të qumështit, i vendos kompanitë e përpunimit të qumështit në një pozicion aspak të favorshëm. Tani ato duhet të orientohen drejt importit për gjetjen e lëndës së parë, gjë që rrjedhimisht sjell kosto shtesë, të cilat më tej do duhet t’iu faturohen konsumatorit. Ekofin.al
