Autoritetet kombëtare të mbrojtjes së të dhënave duhet të shohin një bashkëpunim më të lehtë në rastet e privatësisë ndërkufitare sipas rregullave të përditësuara që u miratuan nga institucionet e BE-së.
Komisioni Evropian planifikoi të rregullonte mangësitë në Rregulloren e Përgjithshme për Mbrojtjen e të Dhënave (GDPR), e cila hyri në fuqi në vitin 2018, duke prezantuar një përditësim në vitin 2023 që synonte përshpejtimin e vendimeve dhe harmonizimin e rregullave procedurale.
Sipas GDPR-së, rregullatorët kombëtarë duhet t’ua transferojnë çështjet mbikëqyrësve të vendosur në shtete të tjera anëtare kur selia e kompanisë është në një vend tjetër. Por ky sistem ndërkufitar është kritikuar nga avokatët e privatësisë pasi ankesat mund të zgjasin me vite për t’u zgjidhur.
Në negociatat ndërinstitucionale midis Komisionit, Parlamentit Evropian dhe shteteve anëtare – palët ranë dakord për një mekanizëm për të zgjidhur ankesat më shpejt përmes masave për të lehtësuar ndërtimin e konsensusit.
Përveç kësaj, rregullat prezantojnë një afat prej 15 muajsh në të cilin duhet të përfundojë një hetim. Mund të zgjatet me 12 muaj në rastet më komplekse.
Ministri i Polonisë për Çështjet Digjiitale, Krzysztof Gawkowski, e quajti marrëveshjen “një hap të madh drejt përmirësimit të bashkëpunimit” midis autoriteteve të mbrojtjes së të dhënave.
Agustín Reyna, Drejtor i Përgjithshëm i grupit të Konsumatorëve BEUC, tha në një përgjigje se “marrëveshja shënon njëfarë progresi për ata si ne, të cilët janë frustruar duke e parë zbatimin e GDPR si thembrën e Akilit”.
Reyna shtoi se është “e rëndësishme duke pasur parasysh fuqinë e shumëkombësheve dhe ritmin e ngadaltë të zbatimit të GDPR gjatë viteve të fundit”.
Max Schrems i NOYB, një avokat dhe aktivist i privatësisë, i tha Euronews se ndërsa ka disa përfitime, si afatet, “rezultati i përgjithshëm do të jetë më pak të drejta dhe më pak zbatim për qytetarët”.
Marrëveshja e përkohshme do të ketë nevojë për një konfirmim zyrtar nga shtetet anëtare dhe Parlamenti.
Muajin e kaluar, Komisioni paraqiti një paketë thjeshtimi për të ofruar lehtësim për kompanitë e vogla me kapital të mesëm të ngarkuara nga fushëveprimi aktual i GDPR-së.
Aktualisht, kompanitë me më pak se 250 punonjës janë të përjashtuara nga rregullat e privatësisë së të dhënave për të ulur kostot e tyre administrative, Komisioni tani propozon ta zgjerojë këtë përjashtim për të ashtuquajturat kompani të vogla me kapital të mesëm me deri në 500 anëtarë të stafit. /Përshtati nga Euronews, ekofin.al
