Banka Jet ka formalizuar një sërë ndryshimesh thelbësore në regjistrin tregtar, që shënojnë fazën përfundimtare të përgatitjes për nisjen e aktivitetit bankar si institucion plotësisht digjital. Sipas të dhënave zyrtare të depozituara në QKB, shoqëria ka ndryshuar emrin e saj nga “Jet Bank” në “Banka Jet” ka rikonfiguruar strukturën e aksionarëve dhe ka përditësuar objektin e aktivitetit në përputhje të plotë me legjislacionin bankar shqiptar.
Në janar 2026, subjekti ka kaluar edhe një transformim të rëndësishëm institucional, duke adoptuar sistemin e administrimit me dy nivele, një standard tipik për bankat, ndërsa emri ligjor i shoqërisë është unifikuar si “Banka Jet”.
Ndryshim i rëndësishëm ka ndodhur edhe në strukturën e pronësisë. Aksioneri i vetëm i bankës është tashmë shoqëria e huaj Jet Holdings B.V., e cila zotëron 100% të kapitalit, duke konsoliduar kontrollin dhe duke garantuar mbështetje financiare për fazën e operimit. Kapitali i regjistruar i Banka Jet arrin në 3.5 miliardë lekë, një nivel që përputhet me kërkesat ligjore për institucionet bankare në Shqipëri.
Po ashtu, objekti i aktivitetit është riformuluar rrënjësisht. Nga një përkufizim i gjerë i shërbimeve financiare, Banka Jet tashmë ka një objekt specifik bankar, i cili përfshin pranimin e depozitave, kredidhënien, shërbimet e pagesave, instrumentet e pagesës, tregtimin financiar, shërbimet e kujdestarisë dhe veprimtari të tjera të lejuara për bankat, gjithmonë në përputhje me licencën dhe kufijtë e përcaktuar nga autoriteti mbikëqyrës.
Këto zhvillime tregojnë qartë se Banka Jet ndodhet tashmë në fazën finale të procesit rregullator dhe është në pritje të marrjes së licencës së dytë nga Banka e Shqipërisë, e cila i hap rrugë nisjes efektive të aktivitetit bankar. Banka Jet do të pozicionohet si banka e parë plotësisht digjitale në Shqipëri, me modele operimi të bazuara në teknologji, pa degë fizike tradicionale dhe me fokus te shërbimet online për individë dhe biznese.
Nëse licenca përfundimtare miratohet, hyrja e Bankës Jet pritet të sjellë një kapitull të ri për sistemin bankar shqiptar, duke rritur konkurrencën dhe duke përshpejtuar transformimin digjital të shërbimeve financiare në vend. /ekofin.al
