Banka e Shqipërisë njofton se tashmë “Apple Pay” është më në fund i disponueshëm edhe në Shqipëri. Përdoruesit e pajisjeve Apple kanë mundësinë të kryejnë pagesa të sigurta dhe të shpejta përmes telefonit të tyre, falë lançimit të shërbimit Apple Pay në vendin tonë. Kjo risi përfaqëson një hap të rëndësishëm drejt dixhitalizimit të përvojës së pagesave për një kategori të gjerë konsumatorësh. thekson Banka e Shqipërisë.
Ndërkohë që përdoruesit e Google Pay kanë tashmë eksperiencë me këtë formë pagese, përfshirja e Apple Pay e plotëson spektrin e shërbimeve të avancuara të pagesave mobile në vend edhe për përdoruesit e iPhone.
Banka e Shqipërisë e përshëndet këtë zhvillim si një kontribut të rëndësishëm në: Modernizimin e infrastrukturës së pagesave, rritjen e aksesit të qytetarëve në shërbime më të sigurta dhe më të përshtatshme, zgjerimin e përfshirjes financiare nëpërmjet teknologjive digjitale.
Apple Pay ofron një përvojë të përmirësuar pagese dhe rrit nivelin e sigurisë në transaksione, duke i sjellë përfitime të drejtpërdrejta përdoruesve të ekosistemit Apple.
Banka e Shqipërisë mbështet sektorin bankar në angazhimin për të qenë pjesë e këtyre nismave dhe në ndërtimin e një sistemi financiar sa më efikas, gjithëpërfshirës dhe të qëndrueshëm, në përputhje me objektivat për transformimin digjital të pagesave.
Dy ditë më parë, ProCredit Bank Shqipëri njoftoi se ishte banka e parë që sillte në Shqipëri Apple Pay, një mënyrë më e sigurt dhe e mbrojtur për të kryer pagesa, që u mundëson përdoruesve të shmangin dorëzimin e kartës tek persona të tjerë, prekjen e butonave fizikë apo shkëmbimin e cash-it – duke përdorur fuqinë e iPhone për të mbrojtur çdo transaksion. /ekofin.al
