Veprimtaria e sistemit financiar për gjashtëmujorin e parë të vitit 2024 paraqitet me ecuri pozitive. Sektori bankar njohu një zgjerim të depozitave dhe përshpejtim të ritmit të kredive, pavarësisht efektit pakësues të mbiçmimit të kursit të këmbimit. Ky është konstatimi i Bankës së Shqipërisë, i paraqitur në raportin e stabilitetit financiar.
Sipas raportit, në terma vjetorë, kredia u zgjerua me 11.1%, ndërsa në krahasim me fundin e vitit 2023, ajo u rrit me 7.1%. Veprimtaria bankare ka treguar rezistencë të mirë ndaj rreziqeve, në kushtet kur kapitalizimi i veprimtarisë mbeti i qëndrueshëm dhe fitimi vijoi të përmirësohej me ritme të kënaqshme. Po kështu në raport konstatohet se rritja ekonomike vjetore shënoi 3.6%, kjo e ndikuar edhe nga ecuria e mirë e konsumit dhe e investimeve, si edhe qëndrueshmëria e performancës së turizmit. Ndërkohë që rritja ekonomike u shoqërua me rritje të punësimit e të pagave si dhe ulje të normës së papunësisë.
Për periudhën e raportuar vihet re gjithashtu një përmirësim i gjendjes financiare të familjeve dhe bizneseve, ndërsa politika fiskale ruajti prirjen konsoliduese në kushtet e rritjes së ndjeshme të të ardhurave fiskale. Presionet e inflacionit pësuan rënie dhe norma e inflacionit zbriti nën objektivin e Bankës së Shqipërisë, duke sjellë uljen prej saj të normës bazë të interesit.
Por, sipas Bankës së Shqipërisë, rreziqet për zhvillimet ekonomike dhe financiare në vend mbeten të pranishme, duke mbajtur në vëmendje pasiguritë që rrjedhin nga zhvillimet gjeopolitike ose nga veprime të pakujdesshme të agjentëve ekonomikë. Banka vlerëson se të gjithë operatorët ekonomikë kanë mundësinë ta shfrytëzojnë këtë periudhë të veprimtarisë për të konsoliduar bilancet e tyre financiare, për të përmirësuar kapacitetet administruese në përgjithësi dhe të rreziqeve në veçanti, si edhe për të rritur efiçencën e veprimtarisë.
