E fokusuar në objektivat për zhvillimin e ekonomisë në rajon, Banka Botërore njofton se do të vijojë të reagojë edhe në të ardhmen ndaj krizave dhe emergjencave.
Me rastin e përfundimit të vitit fiskal 2022 për Bankën Botërore, Anna Bjerde, zëvendëspresidente për Evropën dhe Azinë Qendrore, dha një përmbledhje të 12 muajve të fundit, të cilët shenjuan një kohë të paprecedentë për rajonin.
“Pas një tkurrjeje prej 2 % në vitin 2020, ndërsa vendet u lehtësuan nga ndikimet e menjëhershme të pandemisë, rajoni pa një rikthim të fortë në vitin 2021, me një normë mesatare rritjeje ekonomike prej 6.5 %”, tha Bjerde.
Megjithatë, sot, vuri në dukje përfaqësuesja e BB, rajoni po përballet me shumë sfida serioze, duke përfshirë ndikimet e luftës shkatërruese në Ukrainë, çmimet e larta të mallrave, inflacioni i lartë, varfëria në rritje dhe pasiguria e shtuar.
Banka Botërore ka ofruar mbështetje të madhe dhe të qëndrueshme.
Viti fiskal 2022 shënoi një mbështetje financiare rekord për rajonin prej 8.5 miliardë dollarësh në huadhënie të reja, pjesa më e madhe e saj u përqendrua në mbrojtjen e kapitalit njerëzor, përmirësimin e barazisë gjinore, nxitjen e sektorit privat për të krijuar më shumë vende pune dhe më të mira dhe zbutjen e ndryshimeve klimaterike.
“Edhe në të ardhmen, Banka do të vazhdojë të reagojë shpejt ndaj goditjeve dhe emergjencave, duke u fokusuar në të njëjtën kohë në objektivat e zhvillimit afatmesëm dhe afatgjatë të rajonit”, deklaroi Bjerde.
