Grupi BALFIN synon të zgjerohet më tej në sektorin e transportit, logjistikës dhe shërbimeve postare, duke krijuar tashmë një shoqëri të përbashkët me funksione të plota me operatorin rajonal Milšped, i cili operon prej vitesh në Shqipëri me Milsped Albania, në pronësi të BALFIN me 50% të aksioneve dhe Milsped me 50% tjetër. Vendimi i Autoritetit të Konkurrencës për autorizimin e këtij përqendrimi hap rrugën për kompaninë e re.
Shoqëria e re, M-One Albania shpk, është themeluar si një ndërmarrje e përbashkët mes BALFIN – Balkan Finance Investment Group dhe Milšped DOO Beograd, me synimin për të ofruar shërbime të integruara në transport, logjistikë dhe shërbime mbështetëse, duke përfshirë edhe aktivitetet postare dhe shpërndarjen “last-mile”. Autoriteti i Konkurrencës, pas shqyrtimit të dokumentacionit dhe analizës së tregut përkatës, ka vlerësuar se kjo strukturë nuk krijon kufizime për konkurrencën dhe nuk cenon balancat ekzistuese në treg, duke autorizuar realizimin e përqendrimit.
Sipas Aktit të Themelimit, M-One Albania është konceptuar si një shoqëri me funksione të plota, me objekt aktiviteti të gjerë që përfshin transport kombëtar dhe ndërkombëtar të mallrave, operacione logjistike të integruara, magazinim, menaxhim zinxhiri furnizimi, shërbime doganore, si edhe shërbime shpërndarjeje dhe postare. Ky konfigurim e pozicionon shoqërinë e re si një platformë “end-to-end” për bizneset që operojnë në Shqipëri dhe rajon, në një kohë kur kërkesa për logjistikë të strukturuar po rritet ndjeshëm nga tregtia elektronike, industria dhe eksportet.
Partneri serb Milšped është një nga operatorët më të mëdhenj të logjistikës në Europën Juglindore dhe operon në Shqipëri që prej vitit 2014, duke ndërtuar ndër vite një prani të qëndrueshme në transportin ndërkombëtar, doganat dhe shërbimet logjistike. Përfshirja e Milšped në këtë partneritet i sjell M-One Albania përvojë operacionale, rrjete ndërkombëtare dhe know-how teknik, ndërsa BALFIN kontribuon me kapital, njohje të tregut vendas dhe kapacitete menaxheriale të konsoliduara në sektorë të ndryshëm të ekonomisë.
Në një kohë kur Shqipëria po pozicionohet gjithnjë e më shumë si nyje rajonale për tregti, turizëm dhe shërbime, krijimi i M-One Albania sinjalizon një hap të ri në konsolidimin e sektorit të logjistikës dhe shpërndarjes. Shoqëria e re zotërohet në masën 49% nga BALFIN dhe 52% nga Milšped. /ekofin.al
