Autoriteti i Konkurrencës ka përfunduar hetimin e thelluar ndaj katër ndërmarrjeve Erzeni, Gjirofarma, Lufra dhe SHAKA Boboshticë që operojnë në tregun e djathit dhe gjalpit, duke njoftuar se nuk janë identifikuar shkelje të ligjit për mbrojtjen e konkurrencës. Hetimi, i cili shqyrtoi mundësinë e marrëveshjeve të bashkërenduar mes këtyre kompanive, ka konkluduar se nuk ka prova që sugjerojnë sjellje të koordinuara ose praktika anti-konkurruese.
Në analizën e tregut, Autoriteti i Konkurrencës konstatoi se konkurrenca mbetet e shëndetshme dhe se ka hapësirë për hyrjen e ndërmarrjeve të reja. Çmimet e blerjes dhe shitjes të produkteve të qumështit ishin të ndryshme mes kompanive, një tregues se nuk ka pasur një rritje të çmimit të koordinuar.
Një element i rëndësishëm që u evidentua gjatë hetimit ishte ndikimi i rënies së sasisë së qumështit të lopës, e cila ka çuar në rritjen e kostove të prodhimit të djathit dhe gjalpit. Në këtë kontekst, Autoriteti i Konkurrencës pohoi se ndryshimet në çmimet e produkteve nuk ishin të lidhura me ndonjë marrëveshje të fshehtë mes ndërmarrjeve.
Një shqetësim kryesor mbetet informaliteti i gjerë në industrinë e qumështit, ku më shumë se 80% e tregut është i paformalizuar dhe jashtë kontrollit të autoriteteve. Autoriteti rekomandoi forcimin e inspektimeve mbi cilësinë e qumështit dhe vendosjen e masave të qarta për të luftuar informalitetin në këtë sektor. Po ashtu, u theksua nevoja për rishikimin e legjislacionit dhe akteve nënligjore për të mbështetur një konkurrencë më të drejtë dhe të rregulluar.
