Ministria e Financave ka shpallur procedurën e prokurimit publik për auditimin e jashtëm të projekteve dhe granteve me financim të huaj për periudhën 2024–2026. Ky proces do të zhvillohet nëpërmjet një marrëveshjeje kuadër me një operator ekonomik, sipas të gjitha kushteve të përcaktuara në dokumentacionin përkatës.
Objekti i kontratës është i strukturuar në dy lote kryesore: Loti I: Auditimi i projekteve dhe granteve të financuara nga Banka Botërore dhe Loti II: Auditimi i projekteve dhe granteve të financuara nga donatorë të tjerë.
Fondi limit i vënë në dispozicion për këtë tender arrin në 8.385.000 lekë pa TVSH, i ndarë në Loti I: 1.505.000 lekë pa TVSH në vit dhe 4.515.000 lekë pa TVSH në total si dhe Loti II: 1.290.000 lekë pa TVSH në vit dhe 3.870.000 lekë pa TVSH në total.
Në këtë grup përfshihen shtatë projekte madhore: Health System Improvement Project, i zbatuar nga Ministria e Shëndetësisë dhe Mbrojtjes Sociale, me shpenzime mbi 7,7 milionë dollarë gjatë vitit;
Western Balkans Trade and Transport Facilitation Project, i menaxhuar nga Ministria e Financave dhe Ekonomisë, me mbi 3,2 milionë dollarë shpenzime;
Regional and Local Roads Connectivity Project, i zbatuar nga Fondi Shqiptar i Zhvillimit, me një volum prej afro 9,9 milionë dollarësh;
Project for Integrated Urban and Tourism Development (PIUTD), po ashtu nga Fondi Shqiptar i Zhvillimit, me mbi 8,3 milionë dollarë;
Albania National Water Supply and Sanitation Sector Modernization Program, i zbatuar nga AKUM, me mbi 342 mijë dollarë; Albania Strengthening Quality of Auditing and Reporting Project, i menaxhuar nga Ministria e Financave dhe Ekonomisë, me mbi 405 mijë dollarë; Support to Albania Extractive Industries Transparency Initiative (EITI), i zbatuar nga Ministria e Infrastrukturës dhe Energjisë, me rreth 150 mijë dollarë.
Sipas njoftimit, shërbimi i auditimit do të kryhet brenda një periudhe 2-mujore nga nënshkrimi i minikontratës, ndërsa marrëveshja kuadër do të ketë një kohëzgjatje 36 muaj nga dita e nënshkrimit. /ekofin.al
