Lëvizje të reja në terren në zonën e Vlorës po rikthejnë në vëmendje projektet e mëdha të investimeve të huaja në jug të vendit, në një moment kur interesi ndërkombëtar për bregdetin shqiptar mbetet i lartë.
Një grup i huaj, i përshkruar si “delegacion amerikan”, ka mbërritur së fundmi në zonën e Hidrovorit në Akërni, duke zhvilluar vizita në terren që sipas burimeve lidhen me vlerësime teknike dhe arkitekturore. Burimet bëjnë me dije se bëhet fjalë për një grup arkitektësh.
Delegacioni ka mbërritur në orët e para të mëngjesit në aeroportin e Rinasit dhe më pas është zhvendosur drejt Vlorës, ku ka zhvilluar inspektime në disa zona me potencial zhvillimi. Pritet që vizita të shtrihet edhe në zonën e Portonovës, një tjetër pikë që përmendet shpesh në lidhje me projekte të mundshme investimesh të huaja në sektorin e turizmit dhe zhvillimit rezidencial.
Këto zhvillime vijnë në një kohë kur Vlora dhe zonat përreth po shihen gjithnjë e më shumë si destinacione strategjike për investime të mëdha, veçanërisht në turizëm elitar dhe projekte të integruara resortesh.
Në janar të këtij viti, në të njëjtën zonë u raportua edhe një vizitë e Ivanka Trump, vajzës së presidentit Trump, e cila mbërriti nën masa të rrepta sigurie në Vlorë, e shoqëruar nga një delegacion. Ajo zhvilloi takime në zonën e Ujit të Ftohtë me përfaqësues të një studioje arkitekturore, ku në fokus ishte diskutimi mbi mënyrën e realizimit të një projekti investimi në ishullin e Sazanit.
Paralelisht, disa ditë më parë, Komiteti i Investimeve Strategjike vendosi të rinovojë statusin e investimit strategjik për projektin e resortit në Sazan, i cili lidhet me kompaninë e Jared Kushner. Ky projekt konsiderohet një nga investimet më të rëndësishme të pritshme në sektorin turistik në Shqipëri, me potencial për të transformuar profilin e ofertës turistike në jug të vendit.
Megjithëse nuk ka ende një konfirmim zyrtar mbi qëllimin e saktë të vizitës së delegacionit të fundit, prania e tyre në terren dhe lidhja e mundshme me projekte ekzistuese apo të reja investimi po shihet si një sinjal i vazhdimit të interesit të kapitalit ndërkombëtar për Shqipërinë.
Në këtë kontekst, Vlora dhe veçanërisht zona e Sazanit dhe Karaburunit mbeten në fokus të zhvillimeve strategjike, duke u pozicionuar si një nga nyjet kryesore të investimeve të huaja në turizëm dhe infrastrukturë në vitet në vijim. /ekofin.al
