Këshilli i Ministrave ka miratuar vendimin për përcaktimin e autoritetit të autorizuar që do të realizojë procesin e shenjimit dhe gjurmueshmërisë së bimës së cannabis-it dhe nënprodukteve të saj të destinuara për qëllime mjekësore dhe industriale. Sipas vendimit ky funksion i besohet shoqërisë “ALBTrace Co”, sh.a, e cila aktualisht është e ngarkuar me prodhimin e pullave fiskale.
Në vendim thuhet se, autoriteti i autorizuar për realizimin e shenjimit dhe gjurmueshmërisë, sipas ligjit nr.61/2023, “Për kontrollin e kultivimit dhe përpunimit të bimës së cannabis-it dhe prodhimit të nënprodukteve të saj për qëllime mjekësore dhe industriale”, është shoqëria “ALBTrace Co”, sh.a.
Në mars, u krijua shoqëria shqiptaro-arabe që do të merret me prodhimin dhe shpërndarjen e pullave fiskale. Ekofin.al raportoi ekskluzivisht se u regjistrua në QKB, ALBTrace Co, shoqëria me kapital të përbashkët, ku 51% e aksioneve (shumica e aksioneve) zotërohen nga Shtypshkronja e Letrave me Vlerë dhe 49% e aksioneve nga shoqëria e regjistruar në Emiratet e Bashkuara Arabe, O&S Security and Solutions LLP.
Një nga faktet interesante është se vetë shoqëria arabe, zotërohet në masën 40% nga SICPA Middle East Investments Holding LTD, shoqëri kjo e krijuar nga ish-koncesionari i pullave fiskale që ka operuar deri në vitin e kaluar në Shqipëri, si edhe pjesa tjetër prej 60% nga Oumulat Security Printing LLC, filial i Bankës Qendrore të Arabisë Saudite. Në këtë mënyrë, kompania SICPA, e cila ishte deri në fund të vitit 2024, për 12 vite koncesionari i pullave fiskale në Shqipëri dhe që nuk iu rinovua kontrata koncesionare, rikthehet sërish, këtë herë si ortake në sipërmarrjen e prodhimit dhe shpërndarjes së pullave fiskale. /ekofin.al
