Në kantierin e Orikum-Dukat vijojnë me intensitet punimet për ndërtimin e këtij aksi të rëndësishëm, i cili lehtëson qarkullimin e automjeteve drejt bregdetit të jugut si dhe rrit sigurinë rrugore.
Ministrja e Infrastrukturës dhe Energjisë, Belinda Balluku inspektoi sot punimet që po bëhen për ndërtimin e këtij aksi.
Afati për ndërtimin e këtij aksi rrugor është parashikuar 24 muaj, por ministrja tha se vepra mund të përfundojë më shpejt.
“Shpresojmë që në tre vite i gjithë ky gjerdan infrastrukturor që fillon me bajpasin e Fierit dhe përfundon në dalje të tunelit të Llogorasë në Palasë do të ndryshojë konceptin e udhëtimit në jugun e Shqipërisë“, deklaroi ministrja.
Kreu i ARRSH-së, Evis Berberi bëri të ditur se kemi të bëjmë me një vepër komplekse.
Sipas tij, nga rruga ekzistuese përdoret vetëm segmenti në pjesën fushore dhe pjesa më e madhe e rrugës zhvillohet në luginën e lumit Dukat.
Gjatësia e rrugës shkon në 14.7 km dhe gjerësia parashikohet 10.5 m. Në këtë rrugë do të ndërtohen 3 ura dhe më e madhja ka një gjatësi prej 40 m. Me ndërtimin e këtij aksi koha e udhëtimit nga Vlora në Dukat do të jetë më e shkurtër.
Shpejtësia minimale është parashikuar 60 km/orë në zonat e banuara.
