Tarifa e hyrjes në Venecia, e cila u vendos për herë të parë në vitin 2024, mund të pësojë një rritje të ndjeshme në të ardhmen e afërt.
Kryebashkiaku i sapozgjedhur i qytetit, Simone Venturini, ka njoftuar një propozim për ta rritur taksën për vizitorët ditorë në 50 euro në ditë të caktuara, me qëllim frenimin e mbingarkesës turistike.
Kjo vjen ndërsa të dhënat tregojnë se tarifat aktuale, 5 euro për rezervimet paraprake dhe 10 euro për rezervimet në momentin e fundit, po bëjnë pak për t’i dekurajuar vizitorët.
Venecia propozon rritjen e tarifës së hyrjes në 50 euro
Venturini ka thënë se do t’i kërkojë qeverisë italiane leje për ta rritur tarifën e hyrjes në Venecia në 50 euro në ditë të caktuara.
Shifrat e këtij viti tregojnë se më pak se gjysma e turistëve që paguan për hyrjen në qytet rezervuan paraprakisht për të përfituar nga tarifa e reduktuar prej 5 eurosh.
Nga një total prej 514,710 pagesash të kryera gjatë 42 ditëve të para të zbatimit, 245,503 vizitorë paguan 5 euro dhe 268,207 paguan 10 euro, sipas gazetës italiane Il Gazzettino.
“Problemi janë numrat”, tha për shtypin italian këshilltari për buxhetin i Venecias, Michele Zuin. “Nuk ka shumë diferencë midis 5 dhe 10 eurove. Nëse diferenca do të ishte më e madhe, efekti do të ishte ndryshe.”
Nisma për rritjen e tarifës është mbështetur nga grupe të industrisë së mikpritjes.
“Propozimi i Venturinit është i mirëpritur. Kjo mund të çojë drejt një mënyre për ta përdorur tarifën si nxitës ose frenues për ditët më problematike”, tha Daniele Minotto, drejtor i Shoqatës së Hotelierëve të Venecias (AVA).
“Me një tarifë të shkallëzuar dhe me një kufi shumë më të lartë, të aplikuar çdo ditë, mund të ndikojmë te fluksi i vizitorëve.”
Ai shtoi se 50 euro nuk është një shumë e tepërt, nëse krahasohet me biletat për disa site arkeologjike në botë.
Këshilltari Zuin theksoi gjithashtu se të ardhurat më të larta nga taksa për vizitorët ditorë mund të përfitonin banorët e Venecias.
“Nëse këto para rriten, do t’i investojmë për të kompensuar kostot që qytetarët dhe bizneset përballojnë nga turizmi”, tha ai.
A do të shtrihet gjatë gjithë vitit taksa për vizitorët ditorë në Venecia?
Zuin konfirmoi gjithashtu se “ky do të jetë viti i tretë dhe i fundit i testimit. Pas verës, do të duhet të marrim vendime për t’i dhënë masës një formë më përfundimtare”.
Ai tha se kjo do të përfshijë vlerësimin nëse tarifa duhet të shtrihet gjatë gjithë vitit, ose ndoshta të përfshijë më shumë data, si periudha e Karnavaleve të Venecias, kur qyteti është gjithashtu jashtëzakonisht i mbushur.
Këtë vit, taksa zbatohet në 60 ditë gjatë muajve prill, maj, qershor dhe korrik, dhe aplikohet gjatë orëve të pikut, nga ora 08:30 deri në 16:00.
Ka një sërë përjashtimesh. Personat që nuk duhet ta paguajnë taksën përfshijnë banorët, vizitorët e lindur në Venecia, studentët dhe punonjësit, si dhe turistët që kanë rezervime hoteli ose akomodimi tjetër.
Vizitorët mund të “rezervojnë” ditën e tyre në Venecia në një platformë të dedikuar.
Tarifa është 5 euro, ndërsa turistët që nuk bëjnë rezervim deri në katër ditë përpara duhet të paguajnë 10 euro.
Stafi zyrtar kontrollon kodet QR në pikat kryesore të qytetit, si për shembull jashtë stacionit hekurudhor Santa Lucia. Vizitorët që nuk kanë paguar tarifën ose nuk janë regjistruar si të përjashtuar rrezikojnë një gjobë nga 50 deri në 300 euro./Përshtati nga Euronews, ekofin.al
