Norma maksimale e interesit për kreditë konsumatore ka pësuar ulje të ndjeshme, referuar llogaritjes së fundit të publikuar nga Banka e Shqipërisë, që do të nisë të aplikohet për gjysmën e dytë të vitit 2022.
Vitin e kaluar, Banka e Shqipërisë vendosi të aplikojë një normë maksimale efektive interesi. Sipas ndryshime në rregulloren “Për kredinë konsumatore dhe hipotekare”, NEI (norma efektive e interesit) maksimal do të llogaritet nga Banka e Shqipërisë me bazë 6-mujore, mbështetur në të dhënat e Regjistrit të Kredive.
Duke nisur nga 1 korriku, norma tavan për kreditë e vogla konsumatore, me vlerë deri në 200 mijë lekë, ka zbritur në 136.58%, nga 171.41% që ishte llogaritur për gjashtëmujorin e parë të vitit. Gjithashtu, kjo normë për overdraftet do të jetë 18.26%, nga 19.55% që kishte qenë më parë, ndërsa për kartat e kreditit 26.21%, nga 27.21%.
Në llogaritjet e bëra, norma efektive maksimale e interesit përfshin normën nominale të interesit, komisionet e aplikuara nga huadhënësi dhe të gjitha kostot e kredisë që i transferohen klientit.
Ulje të normës kanë pësuar edhe kreditë në vlerën nga 200 mijë deri në 2 milionë Lekë, të cilat tani do të jepen me normën maksimale 25.89%, nga 38.79%. Në rastin e overdrafteve në këto vlera, norma ka zbritur lehtë, në 16.47%.
