Bletaria dhe prodhimi i mjaltit është kthyer tashmë falë edhe mbështetjes që adreson qeveria për këtë sektor, në një biznes fitimprurës që po fuqizon ekonominë e fermerëve çdo ditë e më shumë.
Ministrja e Bujqësisë dhe Zhvillimit Rural, Frida Krifca në kolazhin e historive me njerëzit e punës, solli në vëmendje shembullin e Aliut nga Hasi, që deri para disa vitesh e nisi biznesin me 5 koshere bletësh, ndërsa sot ka 120 koshere të shpërndara në 3 parqe.
“Aliu prej 25 vitesh rrit bletë në Has, pasion dhe punë e trashëguar nga i ati. Nisur me 5 koshere, sot ka 120 koshere të shpërndara në 3 parqe”, shprehet Krifca.
Ai merr kryesisht mjaltë trumze dhe gështenje, që janë mjaft të kërkuara nga tregu dhe siguron të ardhura të kënaqshme për familjen e tij.
Aliu thotë se pa bletë, nuk ka bujqësi, ndaj zanatin po ua mëson edhe fëmijëve, si udhëheqës të denjë të këtij misioni jetik.
Zhvillimin e këtij sektori, po e mbështet edhe qeveria, përveç financimit për mbarështimin e bletëve me fondet e buxhetit të shtetit, fermerët mund të aplikojë për ndihmë financiare për të ndërtuar një linjë paketimi apo përpunimi të mjaltit përmes programit IPARD.
Ndërkohë që është rritur me 600 milionë lekë fondi për pagesat direkte për fermerët për vitin 2021, ku përfitojnë 1331 bletarë.
